Цi вернецца дадому малы арлец?

Источник материала:

Беларускiм арнiтолагам стала вядома, што ў Егiпце загiнулi некалькi дзясяткаў птушак: 27 малых арляцоў i 30 белых буслоў. Вельмi верагодна, што арляцы маглi быць беларускiмi, а буслы — тым больш, паведамiлi мне ў грамадскай арганiзацыi "Ахова птушак Бацькаўшчыны". І прычына масавай гiбелi птушак таксама застаецца невядомай.

Супрацоўнiк АПБ Аляксандр Вiнчэўскi патлумачыў, якая небяспека ўвогуле чакае крылатых прадстаўнiкоў жывёльнага свету падчас iхняй мiграцыi на зiмоўку ў цёплыя краiны: "Атручванне, паляванне, сутыкненне з лiнiямi электраперадач (ЛЭП) i ветравымi генератарнымi ўстаноўкамi. Страчванне месцапражывання, калi на шляху мiграцыi зменена важная тэрыторыя. Птушкi маглi загiнуць ад знясiлення, бо не здолелi папоўнiць свае рэзервы там, дзе рабiлi прыпынкi яны i iхнiя продкi тысячу гадоў таму". Здзiўленне беларускiх арнiтолагаў выклiкае факт, што загiнулi не толькi гэтыя лунаючыя птушкi, i кулiкi, i асаед знойдзены таксама мёртвымi.

Паводле дадзеных Чырвонай Кнігі Беларусі на нашай тэрыторыі водзіцца 3200—3800 пар малых арляцоў. Наогул, арлец распаўсюджаны на еўрапейскай тэрыторыi ад Прыбалтыкi да паўночнай часткi Грэцыi. Асноўным месцам зiмоўкi птушкi з’яўляецца Афрыка. Але ляцяць гэтыя прадстаўнiкi сямейства шуляковых i ў Iндыю, Iран, Малую Азiю i Iндакiтай. Зразумела, калi б хоць адна птушка з загiнулых была акальцавана, можна было б меркаваць, навакольны свет якой краiны панёс страту. Мiнулым летам мне давялося назiраць за гняздом малога арляца, бачыць паводзiны птушаняцi i моманты падлёту i кармлення яго птушкамi-бацькамi. Праседжваў на дрэве па 5-8 гадзiн, каб зрабiць некалькi характэрных фотаздымкаў. Асаблiва цiкава было назiраць за птушанём 8-9-тыднёвага ўзросту, перад самым яго вылетам, з распасцёртымi крыламi над гняздом. Размах крылаў у такiм узросце можа дасягаць цэлага метра. Птушка гэтая вельмi асцярожная i нават калi не бачыць небяспекi, шчаўчок затвора фотаапарата добра чуе i за 15-20 метраў. Таму фотаздымкi з дарослымi птушкамi заўсёды рэдкiя. Мiжволi думаю, раптам бяда напаткала менавiта гэтых арляцоў. I з нецярпеннем чакаю вясны, каб пераканацца, што я памыляюся.