Матэрыяльная дапамога на лекi будзе аказана

Источник материала:

Самой жанчыне — 79 гадоў, яна iнвалiд ІI групы па слыху. Муж таксама iнвалiд I групы, i хоць пенсiя ў яго большая, чым у жонкi (Надзея Ануфрыеўна атрымлiвае 190 тысяч рублёў), грошай не хапае. У прыватнасцi, на тыя ж лекi. На адрасную дапамогу з-за агульнага сукупнага даходу ды прысядзiбнаму ўчастку, якi яны апрацоўваюць, сям’я заяўнiкаў разлiчваць не можа. А на аднаразовую матэрыяльную дапамогу? Надзея Ануфрыеўна ў 2006 годзе з гэтым жа пытаннем звярталася ў "Звязду" i потым атрымала 60 тысяч рублёў.

— Мы падказалi, што трэба рабiць вашай заяўнiцы. Яна ўласнаручна напiсала заяву з просьбай аказаць аднаразовую матэрыяльную дапамогу, указала мэту — для набыцця лекаў, i праз сацыяльнага работнiка, якi абслугоўвае жанчыну, перадала паперу нам, — сказала нам начальнiк аддзела матэрыяльна-бытавога забеспячэння пенсiянераў i iнвалiдаў упраўлення па працы, занятасцi i сацыяльнай абароне Дзяржынскага райвыканкама Таццяна Сабалеўская. — Пасля гэтага было прынята рашэнне аб аказаннi Надзеi Ануфрыеўне аднаразовай дапамогi ў памеры 85 тысяч рублёў (магчыма, заяўнiца ўжо нават атрымала яе. — С.Р.).

На жаль, другое пытанне нашай ранейшай чытачкi пакуль засталося без адказу. Нагадаем, сям’я доўгi час выпiсвала "Звязду". А потым за кошт райсабеса iм была аформлена бясплатная падпiска на адно з мясцовых перыядычных выданняў. Газета сям’i не вельмi спадабалася, яны хацелi б атрымлiваць зноў "Звязду"... Як высветлiлася, пералiк такiх выданняў, на якiя могуць бясплатна аформiць падпiску пэўным катэгорыям насельнiцтва (маламаёмасным, адзiнокiм i г.д.), зацвярджаецца не на раённым, а на абласным узроўнi...