Нашы людзі на таксi... па-ранейшаму ездзяць?

26.08.2009 10:46 — |

Размер текста:: A; A; A

Источник материала:

Нашы людзі на таксi... па-ранейшаму ездзяць?
У Маскве нядаўна прайшла першая антыкрызiсная забастоўка: два днi вадзiцелi аднаго з самых буйных таксаматорных паркаў адмаўлялiся выходзiць на працу, пратэстуючы супраць iмклiвага скарачэння сваiх даходаў. Згодна з паведамленнямi расiйскiх сродкаў масавай iнфармацыi, канфлiкт вырашыўся хутка i проста — завадатараў акцыi проста звольнiлi. Аднак праблема засталася: у сувязi з крызiсам попыт на паслугi таксi скарацiўся. А якая сiтуацыя цяпер у беларускiх перавозчыкаў? Па каментар мы звярнулiся да дырэктара транспартнай асацыяцыi "Сталiчнае таксi" Канстанцiна Кузьмянкова. У яе ўваходзяць усе 10 перавозчыкаў, што займаюцца такога кшталту перавозкамi ў Мiнску.

— Сёння цяжка сцвярджаць нешта абсалютна адназначна, — сказаў Канстанцiн Мiхайлавiч. — Нейкiя больш дакладныя высновы можна будзе зрабiць па вынiках працы за сакавiк. Рыхтуючыся даць адказы на вашы пытаннi, я спецыяльна пагутарыў з прадстаўнiкамi некалькiх перавозчыкаў. Сiтуацыя ў iх розная: хтосьцi гаворыць, што назiрае зараз пэўнае змяншэнне аб’ёмаў перавозак пасажыраў, але цi звязана гэта напрамую з фiнансавым крызiсам — яшчэ пытанне.

Калi гаварыць пра тарыфы на перавозку пасажыраў, дык пераважная маса перавозчыкаў па Мiнску мае iх сёння на ўзроўнi 1580 рублёў за кiламетр праезду. Дзве дыспетчарскiя службы вызначылi тарыф у памеры 1300 рублёў. Цi звярталiся перавозчыкi ў апошнi час у органы цэнаўтварэння з просьбай аб iх магчымым павелiчэннi? Як сёння ўвогуле працуюць прадстаўнiкi гэтага бiзнэсу?

— Прапаноў аб павелiчэннi тарыфаў ад перавозчыкаў я пакуль не чуў. Напэўна, спрыяе сiтуацыi, у прыватнасцi, тое, што цана на палiва апошнiм часам застаецца ранейшай, — адказаў Канстанцiн Кузьмянкоў. — Што да цяперашнiх умоў... Па-першае, адмiнiстрацыямi раёнаў перавозчыкам даводзяцца пэўныя прагнозныя паказчыкi па тэмпах росту, скажам, на гэты год — 10—12 працэнтаў, па-другое, многае залежыць ад канкрэтнага перыяду года. Ёсць нават такое паняцце, як сезонныя перавозкi. Скажам, у пачатку года, пасля навагоднiх святаў, традыцыйна назiраецца пэўны спад колькасцi людзей, што карыстаюцца паслугамi таксi. Летам перавозкi зноў актывiзуюцца — да сезона масавых водпускаў, а падчас iх зноў традыцыйна бывае зацiшша...