Фестываль «Мір-1812» стартаваў. У першы дзень на тэрыторыі Мірскага замка разгарнуліся эпічныя баі пад казацкія спевы і танцы (фота) (будзе дапоўнена). 21.by

Ля Мірскага замка ўсё ў дыме, на полі — адважныя салдаты дзвюх магутных армій, стрэлы і агонь, удалыя казакі і кавалерысты на канях, смелыя атакі ды заварожаныя гледачы. Нават Леў Талстой здзівіўся тым эпічным эмоцыям, якія зведалі сёння старажытныя муры славутасці. У трэці раз міжнародны фестываль «Мір-1812» сабраў мноства рэканструктараў і гледачоў на карэліцкай зямлі.

У першый дзень фестываля госці ў поўнай меры змаглі адчуць атмасферу 1812 года. Адных прыцягнула пляцоўка ВПЦ «Казацкі Спас» і Праваслаўнага брацтва Праабражання Гасподняга Нясвіжскага благачыння, іншыя з задавальненнем наведалі лагер рэканструктараў, якія прадстаўлялі воінаў рускай і напалеонаўскай армій.

Пабачыць не толькі быт, але і ваенныя перапетыі таго рамантычнага і адначасовага драматычнага часу гледачы змаглі падчас праграмы «Бой за замак» на пляцоўцы «Яблыневы сад». Баталіі сталі рэпетыцыяй перад заўтрашняй грандыёзнай рэканстукцыяй «Бітва пад Міром» пра першае буйное кавалерыйскае змаганне кампаніі 1812 года на тэрыторыі Беларусі. Да слова, гэты тэатр баявых дзеянняў аб’яднаў больш за 100 чалавек з Беларусі і Украіны. Ды і каментавалі яго для гледачоў выбітныя знаўцы гісторыі, сярод якіх — загадчык аддзела па экскурсійнай працы музея «Замкавы комплекс «Мір» Дзмітрый Манкевіч.

Пакуль рэканструктары дарылі гасцям адмысловыя ўражанні, за добры настрой і ўнікальныя сувеніры, у тым ліку і з сімволікай Мірскага замка, адказвалі на фестывалі народныя майстры.

Пасля насычанай «баявой» праграмы і наведвання гандлёвых радоў прысутныя накіраваліся ва ўнутраны дворык замкавага комплексу на гукі музыкі. Там усіх чакалі яскравы і запальны канцэрт калектыва казацкай песні і танца «Маме падабаецца» і лірычны выступ рамантыка напалеонікі Уладзіміра Агапцава.