POSTFfactum

Источник материала:

Чалавецтва вымра да 2110 года, лічыць аўстралійскі вучоны

Аўстралійскі вучоны Франк Фенер упэўнены: праз стагоддзе — да 2110 года — чалавецтва цалкам вымра, паведамляе агенцтва ІТАР-ТАСС. Ён заяўляе, што старажытныя супольнасці людзей вызначаліся павышанай стабільнасцю, а вось сённяшняя глабальная цывілізацыя — далёкая ад гэтага.

Напрыклад, аўстралійскія абарыгены даказалі, што без сучасных дасягненняў навукі яны могуць выжыць на працягу 40—50 тысяч гадоў. А вось сённяшняе грамадства па прычыне сваёй эканамічнай і сацыяльнай дзейнасці паставіла чалавечы род на мяжу поўнага знікнення.

Асабліва небяспечным з'яўляецца нястрымнае спажыванне, рэзкі рост колькасці насельніцтва Зямлі, хуткая змена клімату ў сувязі з глабальным пацяпленнем. Сапраўды, названыя аспекты часта з'яўляюцца прычынай распаўсюджвання інфекцый (напрыклад, цесната насельніцтва густанаселеных краін вядзе да ўзнікнення эпідэмій), а змены клімату могуць пашыраць арэалы пасялення небяспечных маскітаў, якія пераносяць смяротныя вірусы, і прымушаць мутаваць бактэрыі, якія ўжо жывуць у пэўных раёнах.

Трэба сказаць, што 95-гадовы Франк Фенер атрымаў сусветную вядомасць за работы ў галіне мікрабіялогіі. Цяпер ён займаецца таксама праблемамі выжывання чалавека як біялагічнага віду.

Расіяне ў рэйтынгу сваіх галоўных каштоўнасцяў паставілі рэлігію на восьмае месца — адразу пасля сэксу

Эксперты Усерасійскага цэнтра вывучэння грамадскай думкі прадставілі вынікі апытання, праведзенага месяц таму ў 140 населеных пунктах (апытанне было праведзена ў 42 абласцях, краях і рэспубліках Расіі). Апытанне праводзілася з мэтай высветліць, што менавіта для грамадзян краіны з'яўляецца асноўнымі каштоўнасцямі ў іх жыцці.

Самай галоўнай сваёй каштоўнасцю большасць назвалі сям'ю — на першае месца яе паставілі 97 працэнтаў удзельнікаў апытання. На другім месцы па значнасці апынулася дружба з 92 працэнтамі. Трэцяе месца заняло каханне — 86 працэнтаў назвалі яго сваёй асноўнай каштоўнасцю. Столькі ж людзей лічаць асабліва важнай для сябе агульную сітуацыю ў краіне. На пятым месцы размясцілася дзелавая сфера — прафесію і сваю справу галоўнымі назвалі 83 працэнты апытаных расіян. Вольны час галоўны для 81 працэнта рэспандэнтаў. Сэкс у расіян на перадапошнім месцы сярод самых важных сфер жыцця — яго на сёмае месца вывелі галасы 70 працэнтаў удзельнікаў апытання. Рэлігія ў гэтым спісе заняла толькі восьмае месца з 68 працэнтамі.

Зрэшты, як адзначаюць эксперты, за пяць апошніх гадоў значнасць рэлігіі для расіян вырасла на 5 працэнтаў. У 2005 годзе адной з асноўных базавых каштоўнасцяў рэлігію назвалі 63 працэнты апытаных. Пры гэтым жанчыны надаюць большае значэнне рэлігіі, чым мужчыны (75 % супраць 61 % сярод мужчын), адзначае "Інтэрфакс".

Выпускны баль у дзіцячым садку скончыўся бойкай бацькоў

На поўдні амерыканскага штата Каліфорнія бойка бацькоў перашкодзіла цырымоніі выпускнога вечара ў адным з дзіцячых садкоў.

Кур'ёзнае здарэнне адзначана ў сераду раніцай у дзіцячым садку Puesta del Sol Elementary горада Віктарвіла, піша газета The Washіngton Tіmes са спасылкай на прадстаўніцу паліцыі Карэн Хант. Пасля рукапашнай паміж бацькамі падапечных дзяцей дашкольную ўстанову прыйшлося зачыніць і святочную цырымонію спыніць.

Сведкі скандальнага выпадку расказалі паліцэйскім, што спачатку мамы ўстроілі слоўную сварку. Па меры абвастрэння сітуацыі ў справу ўключыліся бацькі сямействаў, і ў выніку бацькі сышліся ў рукапашнай. Дзіўна, але паводле слоў Хант, ніякіх сур'ёзных калецтваў ніхто не атрымаў. Да моманту прыезду паліцыі бакі ўжо абмяняліся порцыяй кухталёў, а таму падстаў для арышту каго-небудзь у вартавых парадку не знайшлося.

Дзеці таксама не пацярпелі, калі не лічыць невясёлых уражанняў ад сапсаванага свята. Пра прычыну канфлікту паміж бацькамі дзяцей не паведамляецца.

Аргенціна — Германія: чыя возьме?

Аргенцінскі сабака-прадракальнік кінуў выклік германскаму васьміногу-празорцу з акіянарыума горада Оберхаўзен і прадказаў паражэнне зборнай Нямеччыны ў матчы за выхад у паўфінал чэмпіянату свету па футболе.

Для таго, каб зрабіць свой прагноз, чатырохногі "вяшчун" па мянушцы Кларыта з аргенцінскага горада Расарыа атрымаў ад сваіх гаспадароў дзве зусім аднолькавых міскі з аднолькавай колькасцю таго ж самага сабачага корму. Розніца складалася толькі ў тым, што на адной з місак быў намаляваны аргенцінскі, а на другой — нямецкі сцяг.

Абнюхаўшы абедзве міскі, Кларыта праігнараваў пачастунак пад нямецкім сцягам, а змесціва другой міскі з'еў з вялікім задавальненнем. Што характэрна, скончыўшы з ежай з першай міскі, на другую, "германскую", ён нават не зірнуў.

Па меркаванні гаспадароў сабакі, паводзіны Кларыта недвухсэнсоўна сведчаць пра тое, што ў матчы з Аргенцінай у зборнай Германіі шанцаў на перамогу няма, перадае ІТАР-ТАСС.

Тым часам васьміног па імені Паўль, які ўжо адгадаў вынік усіх чатырох матчаў чэмпіянату свету па футболе ў ПАР з удзелам зборнай Нямеччыны, упэўнена ставіць на перамогу "бундэсцім". У акварыум да Паўля апускаюць дзве пластыкавыя скрынкі з ежай, на якіх намаляваны сцягі Германіі і каманды-суперніка. Васьміног выбірае адну са скрыначак, прадказваючы тым самым перамогу той ці іншай каманды. Апошні раз Паўль абраў страву менавіта з "нямецкай" скрынкі.

Раней васьміног ужо прадказаў Германіі паражэнне ад Сербіі, а таксама перамогі над Аўстраліяй, Ганай і Англіяй. Па словах прадстаўніка цэнтра Sea Lіfe у Оберхаўзене, дзе жыве васьміног, прагнозы Паўля на чэмпіянаце Еўропы 2008 года, які праходзіў на палях Германіі, спраўджваліся з верагоднасцю 80 працэнтаў.

У Аргенціне лічаць, што няма падстаў верыць васьміногу больш, чым сабаку, але калі ўжо ў такіх пытаннях спадзявацца на "прадказанні", зробленыя жывёламі, то сама меней выходзіць нічыя. У любым выпадку, хто мае рацыю — сабака ці васьміног — чакаць засталося нядоўга: матч Аргенціна — Германія адбудзецца сёння.

Тым часам 70-гадовая чарапаха па мянушцы Хорхе з аргенцінскага горада Мендоса таксама праявіла патрыятызм: падчас імправізаванага спірытычнага сеансу яна пад удзячныя апладысменты без ваганняў паказала на сцяг Аргенціны, аддаючы яму перавагу над нямецкім. 100-кілаграмовая жывёла жыве ў гарадскім акварыуме з 1984 года і з'яўляецца яго галоўнай зоркай. Хорхе мае нават сваю старонку ў Facebook.

Як стала вядома, "празорлівы" васьміног з Германіі сваімі прагнозамі відавочна нажыў сабе ворагаў у Аргенціне. Так, тытулаваны шэф-кухар міжнароднага класа Нікалас Бедароў з горада Мендоса ўжо выклаў у інтэрнэце рэцэпт прыгатавання ежы з германскага празорцы. Ён прапануе зварыць гэтага васьмінога і падаць яго да стала з бульбай з аліўкавым маслам і салодкім перцам. Несумненна, скарыстацца такім рэцэптам не супраць большасць аргенцінцаў.

Алтайскім вернікам падчас набажэнстваў распавядуць пра грэх невяртання даўгоў

У Рэспубліцы Алтай прадстаўнікі Праваслаўнай царквы падчас набажэнстваў у царкоўных пропаведзях будуць гаварыць грамадзянам пра непрымальнасць прынцыпу жыцця ў пазыку, спажывецкага стаўлення да жыцця і да людзей, бо невяртанне даўгоў па царкоўных правілах прыраўноўваецца да прысваення чужога, гэта значыць, крадзяжу.

Як тлумачыць прэс-служба рэспубліканскага ўрада, у прыватнасці, гэта прадугледжвае падпісаны нядаўна ў Горна-Алтайску пратакол пра супрацоўніцтва паміж епіскапам Барнаульскай епархіі Рускай праваслаўнай царквы і выканаўцам абавязкаў галоўнага судовага прыстава Рэспублікі Алтай, паведамляе РІА "Сібір".

У далейшым судовыя прыставы і святары плануюць праводзіць сумесную тлумачальную работу ў структурных падраздзяленнях упраўлення. На гутаркі, чытанні, сустрэчы будуць запрашацца тыя, хто праходзіць па справах аб спагнанні аліментаў, па судовых вытворчасцях аб спагнанні сум у карысць дзяржавы, а таксама ў карысць фізічных і юрыдычных асобаў.

Дарэчы, эксперымент узаемадзеяння служыцеляў Царквы і судовых прыставаў ужо праводзіўся ў многіх рэгіёнах Расіі, і, як лічаць у федэральнай службе судовых прыставаў, ён паказаў выключна станоўчы вынік.