Як толькі на пенсію — адразу ў... акцёры!

Источник материала:

Супрацоўнікі Камянецкага цэнтра сацыяльнага абслугоўвання насельніцтва арганізуюць аматарскі тэатр для людзей пажылога ўзросту.

Жнівень, верасень і кастрычнік пойдуць на падрыхтоўку, а ўжо ў лістападзе самадзейны тэатр збіраецца паказаць першыя пастаноўкі.

— Да нас ужо звярнуліся пажылыя людзі, якія хочуць паўдзельнічаць у гэтым праекце. Ён называецца "Усё жыццё — тэатр", — расказала карэспандэнту "Звязды" загадчык аддзела сацыяльнай адаптацыі і рэабілітацыі Камянецкага цэнтра сацыяльнага абслугоўвання насельніцтва Святлана Парфянюк. — Спачатку будучых акцёраў чакаюць заняткі па сцэнічным майстэрстве, што ўключаюць, напрыклад, практыкаванні па трэніроўцы каардынацыі ці памяці, праца над сцэнарыямі пастановак.

Таксама ў планах Камянецкіх тэатралаў — ставіць не толькі драматычныя спектаклі, але і лялечныя. Як правільна шыць лялькі для такіх пастановак пажылым людзям раскажуць спецыялісты, што далучыліся да ўдзелу ў праекце. Пасля таго, як праца над ім будзе завершана, удзельнікі аматарскага тэатра збіраюцца выступаць са спектаклямі ў дзіцячых садках ці школах.

Ганна ГАРУСТОВІЧ.