АБЗАЦ

Источник материала:

За мінулую пятніцу і выхадныя на дарогах краіны ў ДТЗ загінулі 8 чалавек, 58 атрымалі раненні. За кіраванне транспартнымі сродкамі ў стане алкагольнага ап'янення затрымана 575 кіроўцаў.

У Маладзечне зарэзалі касірку букмекерскай канторы. Здарэнне адбылося ў пятніцу, 24 жніўня. Злачынца прыйшоў у кантору каля бара "Блюз" за некалькі хвілін да закрыцця, прыкладна ў 22 гадзіны. Патрабаваў у касіра грошы. Калі ён нанёс 39-гадовай жанчыне ўдар нажом, яна паспела націснуць кнопку выкліку аховы. Злачынца збег з месца забойства з выручкай. Касір загінула на месцы здарэння. Смерць жанчыны наступіла ад вострай страты крыві пасля колата-рэзаных удараў у шыю. Затрыманы 24-гадовы мужчына, якога падазраюць у злачынстве. Ён мае судзімасць.

У выніку моцнага ветру (да 14 метраў за секунду) у Гомельскай вобласці пацярпелі дзевяць населеных пунктаў у Добрушскім і Гомельскім раёнах. У асноўным былі разбураны апорныя канструкцыі дахаў. Шыферам, што зваліўся з даху сельскагаспадарчай пабудовы, былі забіты два бычкі. Вецер парушыў працу больш як 30 кіламетраў лініі электраперадач у Добрушскім раёне, былі абясточаны восем населеных пунктаў. Ад дрэў, што ўпалі на трох кіламетрах дарогі, утварыліся завалы.

У нядзелю са свайго незашклёнага балкона, размешчанага на 5 паверсе, па неасцярожнасці пры курэнні выпала 19-гадовая мінчанка, што пражывала па вул. Бяды. Ад атрыманых пры падзенні цялесных пашкоджанняў яна памерла на месцы.

Мастацкі кіраўнік ААТ "Dаnkоff Сlub" затрыманы ў Мінску. Яго падазраюць у стварэнні ўмоў для занятку прастытуцыяй, здзейсненае з выкарыстаннем службовых паўнамоцтваў. Праводзіцца расследаванне.

ПОЎНЫ АБЗАЦ У міжнародным аэрапорце Арланда ў Флорыдзе (ЗША) арыштавалі мужчыну, які спрабаваў нелегальна правезці 27 змей з ЗША ў Бразілію. Рэптылій, схаваных у стэрэасістэме, знайшлі супрацоўнікі аэрапорта падчас прасвечвання багажа. Матэус Дэль Марка набыў іх на выставе рэптылій. Агульны кошт змей склаў $10 тыс. Кантрабандыста прызналі вінаватым у вывазе нелегальнага грузу і аштрафавалі на $6 тыс. Акрамя таго, двое сутак ён правёў у турме. Па меркаванні спецыялістаў, Матэус збіраўся прадаць змей.