Шаркаўчане на міжнародным эканамічным форуме ў Віцебску

Источник материала:

З 16 па 17 мая ў Віцебску праходзіў 8 міжнародны эканамічны форум “Інавацыі. Інвестыцыі. Перспектывы”.  У гэтым годзе ён аб’яднаў звыш 85 дэлегацый з 22 краін свету.  У ліку запрошаных гасцей – прадстаўнікі моцных бізнес-кампаній, гандлёвых прадстаўніцтваў і дыпламаты.

Дэлегацыя Шаркаўшчынскага раёна пад кіраўніцтвам старшыні райвыканкама Дзмітрыя Міхайлавіча Ламака таксама прымала ўдзел у форуме і ў чарговы раз на асабістым вопыце пераканалася ў тым,  што эфект ад такіх сустрэч відавочны. Дзелавыя кантакты наладзілі не толькі з айчыннымі,  але і з замежнымі партнёрамі.  У іх ліку кампанія “Белінвестгруп”з Санкт –Пецярбурга,  якая зацікаўлена ў набыцці субстратаў (торфу) для вырошчвання раслін.  Вытворчасць гэтай прадукцыі  ажыццяўляецца на тэрыторыі нашага раёна. Дарэчы,  менавіта 4 віды такіх субстратаў з рознымі дабаўкамі,  якія шырока прымяняюцца ў раслінаводстве,  а таксама драўнінны вугаль прадстаўлялі шаркаўчане ў якасці прадукцыі , што вырабляецца ў нашым рэгіёне,  на  міжнародным эканамічным форуме ў Віцебску. У гэтым годзе ён праходзіў на пляцоўках Летняга амфітэатра.

Падчас адкрыцця мерапрыемства старшыня Віцебскага аблвыканкама Мікалай Мікалаевіч Шарстнёў адзначыў, што ў Віцебскай вобласці ёсць зацікаўленасць у стварэнні высокатэхналагічнай і імпартазамяшчаючай вытворчасці, абмене тэхналогіямі , прамысловай кааперацыі ў развіцці сыравінных зон і эфектыўным выкарыстанні мясцовых рэсурсаў. Акрамя гэтага, значнымі для нас з’яўляюцца мадэрнізацыя тэхналагічных працэсаў, укараненне навуковых напрацовак у сферы медыцыны, адукацыі і развіццё турызму. Па словах старшыні аблвыканкама, найбольш значнай платформай для дыялогу з замежнымі партнёрамі і падпісання двухбаковых дакументаў якраз і з’яўляецца эканамічны форум. Падчас мерапрыемства было падпісана 14 міжнародных пагадненняў, 5 з іх – на асноўнай пляцоўцы форуму. Пасля завяршэння ўрачыстай часткі госці мерапрыемства наведалі розныя дэманстрацыйныя пляцоўкі і выставачныя экспазіцыі, дзе прадстаўнікі бізнес-структур змаглі азнаёміцца з дзелавымі прапановамі беларускіх і замежных партнёраў у розных галінах, пачынаючы ад ІТ-тэхналогій і заканчваючы зонай турызму і адпачынку.  Міжнародны эканамічны форум у Віцебску доўжыўся два дні. Прадстаўнікі розных працоўных калектываў нашага раёна, якія ўвайшлі ў склад шаркаўшчынскай дэлегацыі, таксама атрымалі магчымасць прыняць удзел у яго рабоце і пазнаёміцца з вытворчасцю і прапановамі іншых рэгіёнаў і краін, а таксама прадэманстраваць прадукцыю нашага раёна.

Вольга ЧАРНЯЎСКАЯ.