Главная
Гороскопы
Уладзімір БЕЛЫ, дырэктар Жыліцкага дзяржаўнага сельскагаспадарчага каледжа:
— Шмат актуальных пытанняў было ўзнята Кіраўніком нашай дзяржавы падчас рэспубліканскага семінара-нарады ў дачыненні да развіцця сяла і аграрнага сектара ў цэлым. Асабіста для мяне, як кіраўніка аграрнай установы адукацыі, вельмі блізкімі з’яўляюцца тэмы навуковых падыходаў у развіцці АПК і падрыхтоўкі кадраў.
Як справядліва адзначыў Прэзідэнт, ад кіраўнікоў і спецыялістаў напрамую залежыць арганізацыя ўсіх вытворчых працэсаў у сельскай гаспадарцы. А каб мець найбольшую эфектыўнасць, таму ж самаму спецыялісту трэба не толькі атрымаць грунтоўныя тэарэтычныя і практычныя веды — ён павінен жадаць працаваць, душой хварэць за справу, быць добра знаёмым з сельскім укладам жыцця і вытворчасцю. Калектыў сельгаскаледжа менавіта так і імкнецца будаваць сваю работу з навучэнцамі.
Зараз ва ўстанове адукацыі займаюцца 318 чалавек на дзённай форме навучання і 185 — на завочнай. Плюс 163 навучэнцы атрымліваюць веды ў філіяле “Кіраўскі прафесійны ліцэй”. Рабяты вывучаюць тонкасці агранаміі, плодаагароднінаводства, вытворчасці, захавання і перапрацоўкі сельгаспрадукцыі, а таксама кіравання АПК і інш. Спецыяльнасці — безумоўна, вельмі запатрабаваныя на сяле.
Да нас, акрамя маладых людзей Кіраўшчыны, едуць вучыцца з розных куткоў Беларусі. Адзначым, што большасць нашых навучэнцаў прыязджаюць менавіта з сельскай мясцовасці, а, значыць, яны не па чутках знаёмыя з працай на зямлі, паспелі яе палюбіць. У такіх больш шанцаў вярнуцца да гэтай працы, але ўжо ў якасці спецыяліста, і замацавацца ў сваёй прафесіі, знайсці сябе ў ёй.
Лічу, што атрымаць падчас вучобы грунтоўныя тэарэтычныя веды, безумоўна, вельмі важна. Але неабходна таксама, як кажуць, набіць руку. Таму значная ўвага ў каледжы надаецца набыццю навучэнцамі практычных навыкаў. Прычым не толькі на эксперыментальных плошчах непасрэдна навучальнай установы. Сучасныя сельгасмашыны вывучаюцца на базе вядомых гаспадарак Магілёўшчыны: ААТ “Рассвет імя К.П.Арлоўскага” Кіраўскага, СВК “Гігант” Бабруйскага, УКСП “Дабраволец” Клічаўскага раёнаў. У нашых навучэнцаў ёсць магчымасць не толькі пабываць у якімсьці канкрэтным сельгаспрадпрыемстве, але і, як правіла, у далейшым, пасля завяршэння вучобы ў каледжы, працаўладкавацца ў тую гаспадарку, дзе праходзіла практыка. Гэта мэтанакіраваная работа, якая наладжана такім чынам, каб і ў гаспадарцы пазнаёміліся з будучым спецыялістам, і выпускнік загадзя ведаў месца сваёй будучай работы, адаптаваўся ў працоўным калектыве, вывучыў у поўным аб’ёме свае службовыя абавязкі. І ў такім выпадку куды большы працэнт верагоднасці, што малады спецыяліст застанецца на сяле і будзе прыносіць карысць дзяржаве, а не пачне, як гаворыцца, шукаць іншага хлеба.
Немалаважны той факт, што ў сярэднім 25% навучэнцаў каледжа падчас вучобы ў ім “уваходзяць у смак” і пасля паспяховага заканчэння сярэдняй адукацыйнай установы працягваюць атрымліваць веды на вышэйшай ступені — у ВНУ. Мы, як пастаўшчыкі кадраў, цесна супрацоўнічаем з Беларускай дзяржаўнай сельгасакадэміяй, Гомельскім дзяржаўным аграрна-эканамічным універсітэтам, Магілёўскім універсітэтам харчавання, Бранскай сельгасакадэміяй Расійскай Федэрацыі.
Да нас прыходзіць вялікая колькасць рабят, якія першапачаткова матываваны ў сваім выбары. Галоўнае для кожнага чалавека — знайсці сваё прызванне ў жыцці. Наш каледж многім дапамог гэта зрабіць.