Прививайся, если хочешь быть здоров!

Кожны раз восень ставіць перад выбарам: рабіць прышчэпку супраць грыпу ці не. Прыхільнікі вакцынацыі перакананыя, што без яе ад вірусаў складана будзе адбіцца, праціўнікі ж даказваюць яе пагібельны ўплыў на здароўе. У мінулым годзе прышчэпку зрабілі больш за 3 мільёны беларусаў.

Захварэць ад прышчэпкі немагчыма. Уся вакцына ў Беларусі не змяшчае жывых вірусаў. Вакцына – эфектыўныя лекі, а не бактэрыяльная зброя.

Лёгкае недамаганне пасля вакцынацыі – сведчанне яе паспяховасці: у арганізме адбываецца рэакцыя на ўвядзенне рэчываў, пасля чаго і ствараецца імунітэт ад вірусаў грыпу.

Калі чалавек усё-такі захварэе, ён перанясе грып без ускладненняў. Ускладненні гэтыя вельмі сур’ёзныя: пакутуюць ныркі, сэрца, галаўны мозг, вочы і іншыя органы. Вакцынацыя скарачае колькасць выпадкаў шпіталізацыі з-за пнеўманіі і зніжае рызыку абвастрэння хранічных захворванняў.

У раённай паліклініцы, ва ўсіх амбулаторыях, на ФАПах праводзіцца вакцынацыя супраць грыпу. Бясплатна прышчапляюцца цяжарныя жанчыны, дзеці малодшага ўзросту, пацыенты з хранічнай паталогіяй органаў дыхання, эндакрыннай і сардэчна-сасудзістай сістэм. Усім жадаючым можна прышчапіцца платна. У цэнтральную бальніцу паступіла вакцына “Грыпол плюс” (вытворчасць – Расія) коштам 7 руб. Прышчапляйцеся і будзьце здаровыя.

Ірына ГЛАЗУНОВА, фельчар-валеолаг Шумілінскай ЦРБ.

Надрукавана ў №81 ад 15.10.2019 г.