Хроніка апошніх падзей

Источник материала:

Брытанскi прынц Гары, малодшы сын наследнага прынца Чарльза, можа быць накiраваны ў 2007 годзе на ваенную службу ў Iрак, пiша The Daily Telegraph.

Зараз прынц завяршае вучобу ў ваеннай акадэмii Sandhurst. Як мяркуецца, у Iраку, на мяжы з Iранам, малады афiцэр будзе камандаваць 11 вайскоўцамi i 4 лёгкiмi танкамi. Гары павiнен будзе весцi разведвальныя аперацыi. Бо брытанцы лiчаць, што з тэрыторыi Iрана ў Iрак увозiцца зброя, наркотыкi i грошы для паўстанцаў, а таксама прыбываюць i самi тэрарысты. Гары выказаў жаданне ўдзельнiчаць у баявых дзеяннях на роўных з таварышамі па службе.

IРАН ПАГРАЖАЕ «РАЗБУРАЛЬНЫМ УДАРАМ» У АДКАЗ

Iран неадкладна нанясе «разбуральны ўдар» у выпадку атакi на яго ядзерныя аб’екты. Пра гэта ўчора заявiў мiнiстр абароны краiны Мустафа Махамад Наджар.

Згодна з яго заявай абарона атамнай электрастанцыi, якая будуецца ў Бушэры пры садзейнiчаннi Расii, «мае важнае значэнне для Iрана». Мiнiстр абароны зрабiў гэту заяву падчас паездкi па правiнцыi Бушэр, у якой ён суправаджае прэзiдэнта Iрана Махмуда Ахмадзiнеджада.

У ходзе гэтай паездкi iранскi лiдар у сваю чаргу абвiнавацiў прэзiдэнта ЗША Джорджа Буша ў ваенных злачынствах i паабяцаў, што ў хуткiм часе амерыканскi прэзiдэнт i iншыя прадстаўнiкi сусветных дзяржаў прадстануць перад «судом справядлiвасцi».

АДЗIН СА СТВАРАЛЬНIКАЎ ПАВIЛЬЁНА Ў КАТАВIЦЫ ЗРАБIЎ СПРОБУ САМАГУБСТВА

Адзiн са стваральнiкаў выставачнага павiльёна ў польскай Катавiцы спрабаваў скончыць жыццё самагубствам пасля таго, як 28 студзеня ў вынiку абрушэння даху там загiнулi 63 чалавекi, паведамляе газета Rzecz Pospolita.

Падрабязнасцi не паведамляюцца. Вядома толькi, што iнжынер Яцэк Ю. спрабаваў звесцi рахункi з жыццём ва ўласным доме пасля таго, як атрымаў павестку ў пракуратуру. Яго ўдалося выратаваць. Яцэк Ю. уваходзiць у праўленне фiрмы Invit з Катавiцы, якая распрацоўвала праект рухнуўшага павiльёна.

Пры праектаваннi павiльёна былi вытрыманы ўсе будаўнiчыя нормы, заявiў у пракуратуры кiраўнiк Invit Рышард Мруз. На яго думку, прычына катастрофы заключаецца ў тым, што ўладальнiкi выставачнага комплексу рэгулярна не счышчалi снег з даху. Праектна-канструктарская фiрма Invit узяла за ўзор для павiльёна ў Катавiцы выставачныя павiльёны, раней пабудаваныя ў Iспанii, дзе нiколi не бывае снегу. Гэта адна з версiй следства па справе буйнейшай у Польшчы з 1987 года катастрофы.