«Фiзра» — яшчэ не фiзiчная культура

Источник материала:

Званок на ўрок

Паводле сацыялагiчных даных, пры абсалютна станоўчым стаўленнi людзей да здаровага ладу жыцця, толькi 10—15 працэнтаў насельнiцтва выкарыстоўваюць на практыцы рэкамендацыi спецыялiстаў па захаванню i ўмацаванню здароўя. А ўсё таму, што як кажа Георгiй Бутрым, начальнiк упраўлення сацыяльнай i выхаваўчай работы Мiнiстэрства адукацыi, «мы не сфармiравалi матывацыю да фармiравання здаровага ладу жыцця». Паводле слоў Георгiя Аляксеевiча, у краiне ёсць школы, дзе правiльна наладжана фiзiчная падрыхтоўка, аднак у цэлым дашкольныя i школьныя ўстановы яшчэ не ўкаранiлi культ здароўя. Са свайго боку Мiнiстэрства адукацыi ўводзiць у гэтым навучальным годзе фiзiчную культуру ў якасцi экзамену па выбару, будуць наладжаны алiмпiяды па здароваму ладу жыцця, адраджаюцца спартакiяды. Мяркуецца, што шосты дзень вучэбнага тыдня трэба пакiнуць выключна фiзкультурным i недапушчальна прысвячаць яго iншым прадметам. Для 11 класаў будзе створаны «жывы» падручнiк з цiкавымi заданнямi, малюнкамi, рэкамендацыямi — так, каб па iм можна было зразумець, як i дзеля чаго займацца самастойна.

— Летась мы наведалi пачатковыя класы 68 школ i 35 дзiцячых садкоў. Мы не бачылi, каб у садках дзецi не бралi ўдзел у фiзiчных занятках, а вось для школ «лава запасных» — звычайная з`ява, — гаворыць загадчыца аддзяленнем урачэбнага кантролю Рэспублiканскага цэнтра спартыўнай медыцыны Галiна Бонiк. — У 1—4 класах дзецi адназначна страчваюць цiкавасць да фiзкультуры...

Мiж тым, заняткi ў пачатковай школе павiнны адбывацца ў асобных памяшканнях, весцi iх павiнен выкладчык фiзiчнай культуры. На думку спецыялiстаў, школы маюць патрэбу ў штатнай адзiнцы ўрача, паколькi выключна ён можа вызначыць узровень функцыянальнага стану дзiцяцi i яго гатоўнасць да нагрузак. У процiлеглым выпадку дзецi часта неабгрунтавана вызваляюцца ад любых нагрузак: спецыяльныя медгрупы вылучаюцца надзвычай нiзкiм наведваннем. Магчыма, сiтуацыя зменiцца пасля завяршэння работы над вучэбнай праграмай для спецмедгруп. Аднак пакуль надта вялiкая колькасць вучняў забывае прыхапiць з сабой форму. Падставай для вучнёўскай нелюбовi да «фiзры» можа паслужыць i тое, што нарматываў, быццам бы, няма, аднак рэдкi настаўнiк не арыентуецца на iх падчас выстаўлення адзнак, а ўлiчвае магчымасцi i поспехi канкрэтнага Iванова.