Зручны «транспартны калiдор»

Источник материала:

Беларускi транзiт

Нiхто, напэўна, так не цэнiць час, як грузаперавозчыкi. Для iх лiтаральна кожная хвiлiна — залатая. Спецыялiсты падлiчылi, што адны суткi прастою аўтафургона на мяжы каштуюць для перавозчыка не менш за 500 долараў. Вось чаму «дальнабойшчыкi» шукаюць не толькi самы кароткi шлях дастаўкi груза, але i самае зручнае месца для перасячэння мяжы.

Не дзiва, што на пункт пропуску «Каменны Лог», размешчаны на беларуска-лiтоўскай мяжы, сёлета абрынулася сапраўдная «грузавая лавiна». У гэтым на свае вочы пераканалiся беларускiя i расiйскiя журналiсты, якiя наведалi памянёны ўчастак мяжы. Паводле слоў начальнiка Ашмянскай мытнi Iвана Нiвяркевiча, у параўнаннi з мiнулым годам сёлета грузапаток праз «Каменны Лог» павялiчыўся на 25 працэнтаў. Аднак нiякага ажыятажу i даўжэзных чэргаў у пункце пропуску мы не заўважылi. Беларускiя пагранiчнiкi i мытнiкi працуюць зладжана i хутка. Уся працэдура афармлення грузаў i пасажыраў нагадвае механiзм дакладнага гадзiннiка. Тут дзейнiчае прынцып «аднаго акна», грузаперавозчыкам не трэба «блукаць» па розных мытных, пагранiчных, фiтасанiтарных iнстанцыях. Зручна i пасажырам, бо працуе сiстэма «зялёнага» i «чырвонага» калiдораў для фiзiчных асоб. Нагадаю, што асобы, якiя перасякаюць мяжу без «камерцыйнага» багажу, могуць свабодна прайсцi без мытнага агляду праз «зялёны» калiдор. Мытнiкi, вядома ж, маюць права дэталёва праверыць падазроных грамадзян. Але для гэтага павiнны быць вельмi важкiя падставы. Увогуле ў сярэднiм пад мытны агляд тут падпадаюць не больш чым 1—1,5 працэнта ўсiх пасажыраў i грузаў. Таму для законапаслухмяных грамадзян «перспектыва» марна патрацiць час на мяжы зведзена да нуля.

Безумоўна, такую зладжаную i аператыўную працу пункта пропуску немагчыма было б наладзiць без адпаведнай «iнфраструктуры», не ўкаранiўшы сучасную мытную сiстэму афармлення грузаў.

Варта нагадаць, што «Каменны Лог» з’яўляецца яскравым прыкладам супрацоўнiцтва Беларусi, Расii i Еўрапейскага Саюза. Пункт пропуску быў рэканструяваны ў 2002 годзе менавiта за грошы Саюзнай дзяржавы i ЕС. Удзел беларусаў, расiян i еўрапейскай супольнасцi ў аднаўленнi «Каменнага Логу» — зусiм заканамерны. Для ўсiх ён вельмi патрэбен, бо размешчаны на буйнейшай аўтамагiстралi «Мiнск—Вiльнюс», якая ўваходзiць у склад 9-га транспартнага калiдора трансеўрапейскай сеткi. Праз гэты калiдор перамяшчаецца прыкладна 80 працэнтаў грузаў у Расiю. Пасля рэканструкцыi прапускная здольнасць «Каменнага Логу» павялiчылася ў 2 разы i складае 2060 аўтамабiляў у суткi. Зараз сярэднясутачная загружанасць пункта пропуску крыху больш за 1800 транспартных сродкаў. Так што «Каменны Лог» яшчэ працуе не на поўную магутнасць i можа, напрыклад, дапамагчы зняць напружанне на латвiйска-расiйскай мяжы, дзе апошнiм часам утварылiся шматкiламетровыя чэргi.

Мiкола ДЗЯБЁЛА,

Мiнск — Каменны Лог — Мiнск.