Зброю здайце i чакайце...
Мiкола ДЗЯБЁЛА
Канферэнц-зала Уладальнiкi падпольных арсеналаў цывільнай зброi атрымалi шанц легалiзаваць свае пiсталеты i стрэльбы.У жыццi, як i на сцэне: калi на сцяне ў першым акце спектакля вiсiць дубальтоўка, то ў другiм — яна абавязкова павiнна выстралiць. Вось ужо шмат дзесяцiгоддзяў ў нашай краiне iснуе цэлы арсенал гэтых «стрэльбаў запаволенага дзеяння». Бо як адзначыў падчас сустрэчы з журналiстамi начальнiк упраўлення прафiлактыкi МУС краiны Мiкалай Дрозд, да 1976 года жыхары Беларусi мелi магчымасць набываць паляўнiчую гладкаствольную зброю без спецыяльнага дазволу. Многiя такiм правам карысталiся. У вынiку ўтварыўся вялiкi запас няўлiчанай зброi, якая тоiць небяспеку. Напрыклад, летась у нашай краiне было здзейснена 212 злачынстваў з прымяненнем агнястрэльнай зброi. Прычым большасць парушальнiкаў закона выкарыстоўвалi менавiта незарэгiстраваную цывільную зброю: дубальтоўкi, газавыя, сiгнальныя, спартыўныя пiсталеты. Мiлiцыя, безумоўна, актыўна выяўляе ўладальнiкаў незарэгiстраванай зброi i прымае меры. Летась за незаконнае захоўванне зброi i боепрыпасаў каля 500 чалавек былi прыцягнуты да крымiнальнай i больш за 4 тысячы — да адмiнiстрацыйнай адказнасцi. Было канфiскавана больш за 1,5 тысячы незарэгiстраваных «ствалоў», яшчэ амаль тысячу адзiнак зброi грамадзяне здалi добраахвотна. Аднак гэтых мераў недастаткова, каб навесцi належны парадак у сферы абарачэння цывільнай зброi. Таму 27 сакавiка гэтага года ўступiў у сiлу прэзiдэнцкi указ №148, якi прадугледжвае шэраг мераў па забеспячэнню рэгiстрацыi няўлiчанай зброi. Паводле памянёнага дакумента, асобы, якiя да 1 лiпеня добраахвотна здадуць у мiлiцыю «нелегiтымную» цывільную зброю, не толькi будуць вызвалены ад адказнасцi, але i атрымаюць шанц зарэгiстраваць «падпольныя» арсеналы. Праўда, першапачаткова зброя павiнна прайсцi экспертызу. Калi ў спецыялiстаў не будзе нiякiх прэтэнзiй да зброi, то яе вернуць уладальнiку. Магчыма, што «некандыцыйную» зброю канфiскуюць i здадуць на металалом. У такiм выпадку кампенсацыi гаспадару не прадугледжаны. Не ўсе асобы, чыя зброя паспяхова пройдзе экспертызу, аўтаматычна змогуць яе ўзаконiць. Права на рэгiстрацыю няўлiчанай зброi маюць толькi грамадзяне Беларусi, якiя дасягнулi 18-гадовага ўзросту, i не маюць пярэчанняў з боку адмысловых медыцынскiх службаў i праваахоўных органаў. Пры рэгiстрацыi дубальтоўкi неабходна будзе прадаставiць у мiлiцыю «паляўнiчы бiлет», а падчас пастаноўкi на ўлiк спартыўнага пiсталета — дакумент, якiя пацвярджае прыналежнасць да спартыўнай арганiзацыi па кулявой стральбе. На адну асобу можна зарэгiстраваць не больш двух адзiнак газавай, спартыўнай i наразной паляўнiчай зброi, а таксама не больш трох «гладкiх ствалоў». Працэдура рэгiстрацыi платная: 4 базавыя велiчынi за кожны «ствол». А праз кожныя тры гады давядзецца праходзiць перарэгiстрацыю i плацiць па 2 «базавыя». Дарэчы, зараз па звестках МУС у Беларусi зарэгiстравана больш за 165 тысяч адзiнак цывільнай зброi, з якiх 145 тысяч — гладкаствольныя паляўнiчыя стрэльбы.
Чтобы разместить новость на сайте или в блоге скопируйте код:
На вашем ресурсе это будет выглядеть так
Уладальнiкi падпольных арсеналаў цывільнай зброi атрымалi шанц легалiзаваць свае пiсталеты i стрэльбы
|
|