Аляксандр Лукашэнка: «Незалежная Беларусь — наш дастойны i надзейны дом»

Источник материала:

Учора на сумесным пасяджэннi абедзвюх палат парламента Прэзiдэнт звярнуўся са штогадовым Пасланнем да беларускага народа i Нацыянальнага сходу Беларусi

Перш чым раскрыць стратэгiю дзяржавы на блiжэйшую перспектыву, а менавiта яна ўтрымлiваецца ў традыцыйным звароце кiраўнiка дзяржавы, па прапанове Аляксандра Лукашэнкi ўдзельнiкi сумеснага пасяджэння хвiлiнай маўчання ўшанавалi памяць першага прэзiдэнта Расiйскай Федэрацыi Барыса Ельцына. Як адзначыў беларускi лiдар, гэта цяжкая страта не толькi для братняй Расii, але i для нашай краiны. «Барыс Мiкалаевiч стаяў каля вытокаў будаўнiцтва Саюзнай дзяржавы, стварэнне якой лiчыў жыццёва важным i гiстарычна неабходным для нашых брацкiх народаў», — падкрэслiў кiраўнiк Беларусi. I пасля завяршэння прэзiдэнцкiх паўнамоцтваў Ельцын пастаянна цiкавiўся жыццём Беларусi, актыўна ўдзельнiчаў ва ўмацаваннi iнтэграцыi на постсавецкай прасторы. «Ён смела i па-дзелавому вырашаў многiя складаныя задачы ў iмя нашых агульных iнтарэсаў, для ўмацавання раўнапраўнага супрацоўнiцтва Беларусi i Расii», — адзначыў Аляксандр Лукашэнка. Прэзiдэнт пацвердзiў вернасць стратэгiчнаму курсу на пабудову Саюза з брацкай Расiяй.

Вяртаючыся ўласна да Паслання, беларускi лiдар адзначыў, што гэта не справаздача. Пасланне павiнна асвятлiць актуальныя пытаннi сучаснага развiцця, адносiны да iх нашай краiны i намецiць стратэгiчныя напрамкi дзяржаўнай палiтыкi на блiжэйшую перспектыву.

«Мы жывём у цесна ўзаемазвязаным свеце. Дынамiка развiцця сусветных працэсаў i мiжнародных адносiнаў, iх уплыў на сiтуацыю ў Беларусi аб’ектыўна запатрабавалi ўнясення ў 2007 годзе пэўных карэктываў у праводзiмую ўнутраную i знешнюю палiтыку дзяржавы», — заявiў Аляксандр Лукашэнка. Аднак нашы стратэгiчныя мэты пабудовы эканамiчна моцнай, сацыяльна справядлiвай, незалежнай дзяржавы на аснове паступальнага сацыяльна-эканамiчнага развiцця краiны застаюцца нязменнымi.

Паводле слоў Прэзiдэнта, галоўная задача сёння — усiмi сiламi i сродкамi ўмацаваць самастойнасць беларускай дзяржавы. Гэта значыць, забяспечыць права самастойна праводзiць уласную знешнюю i ўнутраную палiтыку, забяспечыць нацыянальную бяспеку па ўсiх яе складовых — ад абароннай да iнфармацыйнай i харчовай. Менавiта таму сёлетняе Пасланне мае такую назву.

Звяртаючыся да тэмы ўзаемаадносiнаў Беларусi з iншымi дзяржавамi, Аляксандр Лукашэнка адзначыў, што сёння «захаваць незалежнасць i ўстойлiвае развiццё краiны можна толькi праводзячы дынамiчную рознабаковую знешнюю палiтыку». Разам з тым гэта не рэакцыя на нейкiя падзеi.

«Мы заўсёды заяўлялi аб тым, што Беларусь праводзiць шматвектарную знешнюю палiтыку, — падкрэслiў кiраўнiк дзяржавы. — Па-iншаму i быць не можа, паколькi мы — адкрытая краiна, якая знаходзiцца ў цэнтры Еўропы».

Не будзе i стратэгiчных змяненняў у прыярытэтах: асноўны з iх — захаванне прынцыпова важнага для Беларусi расiйскага напрамку.

Прэзiдэнт прызнаў, што неапраўдана рэзкае павышэнне цэн на расiйскiя энерганосьбiты i яўна недружалюбныя дзеяннi i выказваннi асобных палiтыкаў балюча ўдарыла па нашых адносiнах. «Але калi нехта чакае, што Беларусь з-за ўзнiкшых цяжкасцяў будзе вагацца i мяняць напрамак свайго руху, то глыбока памыляецца», — падкрэслiў Аляксандр Лукашэнка. Беларускi лiдар глыбока перакананы, што пераадолець iснуючыя перашкоды i рухацца далей у справе саюзнага будаўнiцтва — у iнтарэсах нашых народаў. Аднак саюз павiнен быць выключна раўнапраўным, узаемавыгадным, зразумелым, справядлiвым i празрыстым. Толькi такi падыход падтрымаюць людзi.

Беларусь не мае намеру адмаўляцца i ад iншых iснуючых iнтэграцыйных утварэнняў — АЭП, СНД, ЕўрАзЭС, АДКБ. Разам з тым наша дзяржава гатова быць паўнапраўным, надзейным, прадказальным i адказным партнёрам у агульнаеўрапейскiх працэсах. Паводле слоў Прэзiдэнта, у адносiнах з ЕС i ЗША павiнен нарэшце перамагчы здаровы сэнс, i негатыўныя мiфы i стэрэатыпы адносна нашай краiны павiнны быць пераадолены. Аляксандр Лукашэнка ўпэўнены, што «нам ёсць што сказаць адзiн аднаму ў эканомiцы, палiтыцы, сацыяльнай сферы». «Мы свядома iмкнёмся да таго, каб не залежаць ад адной краiны. Сёння першае месца ў гандлёва-эканамiчным супрацоўнiцтве з Беларуссю ўжо займае Захад, Еўрасаюз, затым iдзе Расiя», — канстатаваў кiраўнiк дзяржавы. Беларусь гатовая да ўзаемапаважлiвага дыялогу i ўзаемапрымальных рашэнняў.

У кантэксце стварэння комплексу транспартных калiдораў Усходняя Азiя—Еўропа наша краiна зацiкаўлена стаць надзейным звяном эканамiчнай сiстэмы ўжо еўразiйскага маштабу. Плённа развiваюцца ўзаемаадносiны з нашым вядучым саюзнiкам на мiжнароднай арэне — Кiтаем. Летась тавараабарот з гэтым гiгантам амаль дасягнуў мiльярда долараў ЗША. А сёння на разглядзе кiтайскага боку знаходзiцца пакет беларускiх iнвестыцыйных прапаноў на суму больш як 2 мiльярды долараў.

Вялiкiя перспектывы мае Беларусь у рамках Руху недалучэння. «Паглядзiце, найбагацейшыя па сваiх рэсурсах i ўплывовыя краiны — Iндыя, Венесуэла, Iран, Аб’яднаныя Арабскiя Эмiраты, Султанат Аман — гатовы працаваць i ўжо працуюць з намi ў фармаце стратэгiчнага партнёрства», — заявiў Аляксандр Лукашэнка. Дамоўленасцi, дасягнутыя на вышэйшым узроўнi, ператвараюцца ўжо ў канкрэтныя праекты i кантракты на сотнi мiльёнаў долараў. Супрацоўнiцтва з некаторымi з гэтых краiн у сферы здабычы нафты таксама абсалютна рэальнае. Як падкрэслiў беларускi лiдар, наша краiна павiнна мець магчымасць альтэрнатыўных паставак на выпадак энергетычнага крызiсу.

Звяртаючыся да наступстваў падзей мiнулай зiмы, Аляксандр Лукашэнка запэўнiў: нiякага абвалу мы не дапусцiм. Вынiкi работы эканомiкi ў першым квартале лепшы таму доказ. «У дамах будзе святло i цяпло, прадпрыемствы будуць працаваць у звычайным рэжыме, тарыфы на жыллёва-камунальныя паслугi застануцца ў запланаваных параметрах. Усё гэта можа быць дасягнута за кошт унутраных рэзерваў — эфектыўнай вытворчасцi i беражлiвасцi», — перакананы кiраўнiк дзяржавы.

Увогуле, эканомiю i беражлiвасць беларускi лiдар назваў «вялiкiм, нявыкарыстаным у поўнай меры рэзервам для далейшага росту эканомiкi». «Гэта пытанне нацыянальнай бяспекi. Менавiта таму я даручыў падрыхтаваць Дырэктыву № 3, якая змяшчае комплекс мерапрыемстваў па вырашэнню гэтай праблемы», — паведамiў Аляксандр Лукашэнка. Адказным за яе выкананне прызначаны прэм’ер-мiнiстр Беларусi Сяргей Сiдорскi.

Беларусы павiнны навучыцца жыць па сродках, як гэта робяць заможныя еўрапейцы, лiчыць кожны рубель. У першую чаргу неабходна максiмальна наблiзiцца да развiтых краiн па ўзроўню энергаёмiстасцi валавога ўнутранага прадукту. У нас гэты паказчык у 2,5—3 разы вышэйшы.

Ва ўмовах адсутнасцi ўласных энергарэсурсаў i як вынiк цяжкай залежнасцi ад iншых краiн пытанне аб стварэннi ўласнай ядзернай энергетыкi становiцца адной з гарантый нацыянальнай бяспекi, адзначыў Прэзiдэнт. Да яе будаўнiцтва нас падштурхоўвае само жыццё. Кiраўнiк Беларусi выдатна разумее псiхалагiчныя цяжкасцi i хваляваннi людзей, якiя пацярпелi ад чарнобыльскай трагедыi. Аднак наша краiна i без таго знаходзiцца ў коле атамных станцый. Да таго ж гэты вiд энергii самы танны, таму набiрае ўсё большую папулярнасць у цывiлiзаваным свеце. Дзесяткi i сотнi энергаблокаў узво- дзяць Еўропа i Расiя. I куды менш забяспечанай энергарэсурсамi Беларусi не выпадае заставацца на ўзбочыне прагрэсу. Што датычыцца бяспекi, то, паводле слоў Аляксандра Лукашэнкi, «у Беларусi будзе выбраны самы бяспечны варыянт АЭС з улiкам суперсучасных тэхналогiй i найноўшых дасягненняў навукi».

Звяртаючыся да парламентарыяў, Прэзiдэнт заявiў, што законапраект «Аб дзяржаўных сацыяльных iльготах, правах i гарантыях для асобных катэгорый грамадзян» трэба будзе разгледзець на веснавой сесii. Адцягваць упарадкаванне сацыяльных iльгот далей немагчыма.

У пэўных колах iснуе перакананне, што гэта «непапулярная мера». «Папулярнасць не трэба змешваць з папулiзмам, — заявiў Аляксандр Лукашэнка. — Я заўсёды праводзiў сумленную i адкрытую палiтыку i нiколi, нi пад якой маркай не купляў папулярнасць».

Настаў час перагледзець iснуючую сiстэму льгот, якая для большасцi людзей iстотнага значэння не мае, а ў вынiку распыляюцца вялiкiя бюджэтныя сродкi.

Сацыяльная дапамога павiнна быць адраснай i iндывiдуальнай, глыбока перакананы кiраўнiк дзяржавы. У ёй безумоўна маюць патрэбу iнвалiды, адзiнокiя старыя, дзецi-сiроты. «Iншым, хто трапiў у складаную жыццёвую сiтуацыю, патрэбна рука дапамогi, каб стаць на ногi, а не пажыццёвае ўтрыманне», — адзначыў Прэзiдэнт.

Усе вызваленыя сродкi пойдуць не на абстрактныя патрэбы, а мэтавым прызначэннем на рэалiзацыю дзяржаўных праграм па ахове мацярынства i дзяцiнства, чарнобыльскiх праграм. Калi людзям правiльна ўсё растлумачыць, яны гэта зразумеюць, упэўнены Аляксандр Лукашэнка.

Самая маштабная частка сiстэмы сацыяльнай абароны для дзяржавы — пенсiйнае забеспячэнне. Iм ахоплена больш за 2,5 мiльёна чалавек. Паводле слоў Прэзiдэнта, наспела неабходнасць удасканалiць яго прынцыпы. У перспектыве ў пенсiйную сiстэму будзе ўключаны накапляльны кампанент. Гэта дазволiць праяўляць iнiцыятыву самому чалавеку, будзе стымуляваць яго жаданне забяспечыць сабе годную старасць.

Сяргей ПРОТАС.

(Заканчэнне ў наступным нумары).