Барыс Батура: «Мясцовыя Саветы павiнны арганiзаваць працу па аказанню паслуг насельнiцтву»

Источник материала:

Пра ўклад Саветаў у агульную справу

Ёсць закон аб мясцовым самакiраваннi, i ў яго межах мясцовыя Саветы i сельвыканкамы павiнны дзейнiчаць. Стан могiлак, знешнi выгляд вёсак, выкананне сацыяльных стандартаў на месцах, падтрымка насельнiцтва, асаблiва састарэлага, работа з iм — вось iх галоўныя задачы.

Чаму абавязкова апрацоўваць агарод павiнен нехта збоку? Ёсць спецыяльныя брыгады пры сельвыканкамах, якiя аказваюць гэты вiд паслуг i адначасова зарабляюць грошы, фармiруючы свае бюджэты.

Такiя асноўныя задачы Саветаў, i яны павiнны арганiзоўваць iх выкананне. Канешне ж, у сельвыканкаме працуе 3—4 чалавекi, i зразумела, што яны не возьмуць у рукi рыдлёўкi i сякеры i не пойдуць працаваць самi, але арганiзацыя такой працы — гэта за iмi. I мы будзем сур’ёзна патрабаваць яе выканання.

Пра старастаў вёсак i аплату iх працы

Ёсць адпаведны Указ № 21 па фармiраванню бюджэтаў сельвыканкамаў. У прынцыпе, у iх ёсць магчымасць зарабляць грошы i накiроўваць iх у тым лiку i на заахвочванне старастаў. Калi чалавека заахвоцiлi за добрую грамадскую працу, цi гэта дрэнна? Канешне, добра! I грошы ў сельвыканкамаў павiнны на гэта быць.

Мы калiсьцi паказвалi, як у Быхаўскiм раёне сельскi Савет i аўтамабiль набыў толькi за кошт аднаго збору малака ў насельнiцтва. Каб грошы былi, трэба «круцiцца».

Пра вёскi, якiя памiраюць

Калi ў вёсках засталiся адна-дзве сям’i цi некалькi жыхароў, трэба падцягваць iх на цэнтральныя сядзiбы, даваць жыллё там. А такая магчымасць ёсць. А ў старых вёсках усё лiквiдаваць, каб не было рассаднiкаў смецця.

Я не магу зразумець, чаму ёсць праблемы з вёскамi што памiраюць. Праблем не павiнна iснаваць, калi на тэрыторыi ёсць нармальны гаспадар. Няма вёскi, нiхто не жыве — значыць, трэба яе лiквiдаваць.

Няўжо мы спадзяёмся, што людзi валам паваляць у вёску? Я, дапусцiм, на гэта сур’ёзных надзей не ўскладаю. Пры наяўнасцi сучаснай тэхнiкi ў сельскай гаспадарцы ў нас у працы задзейнiчана 25—30 працэнтаў насельнiцтва, а на Захадзе — усяго 3—5 працэнтаў спраўляюцца з вытворчасцю прадукцыi сельскай гаспадаркi i забяспечваюць ёй астатнiх удосталь.

I ў нас тое ж самае намячаецца. Напрыклад, у Магiлёўскай вобласцi было пад 3 тысячы камбайнаў. Цяпер у нас засталося 1600, i нам болей не трэба. А калi гаварыць дакладна, то нам патрэбны 1200 камбайнаў — але нармальных, каб яны працавалi належна. Тое ж самае i з трактарамi. Iншымi словамi — патрэбы сельскай гаспадаркi ў працоўнай сiле таксама скарачаюцца. Сельская праца таксама павiнна быць высокапрадукцыйнай.

Запiсала Iлона IВАНОВА.