Фотафакт. Найбуйнейшая ў Еўропе зімоўка кажаноў

Источник материала:

Фотакарэспандэнтка НН Юлiя Дарашкевiч пранiкла ў найбуйнейшую ў Эўропе зiмоўку кажаноў.

Тут iх сотнi, яны вiсяць дагары нагамi i зрэдку папiскваюць. Найбуйнейшая ў Эўропе зiмавальная калёнiя рукакрылых (Barbastella barbastellus, цi Шырокавушка эўрапейская - так называюць гэтых кажаноў навукоўцы) месьцiцца на ўскрайку Берасьця, у старой фартэцы.

Мы спускаемся ў скляпеньне разам з актывiсткай арганiзацыi "Ахова птушак Бацькаўшчыны" Марыей Дзямянчык. Тут цёмна i вiльготна. "Мiкраклiмат, як у пячорах" - гаворыць навукоўца. Размаўляем шэптам, каб не пабудзiць кажаноў.

Афiцыйна гэтае месца называецца бiялагiчны заказьнiк "Барбастэла". Штогод на зiмоўку сюды зьлятаюцца да трох тысяч кажаноў. Навукоўцы назiраюць за iмi ўжо год 10, аднак толькi нядаўна для рукакрылых абсталявалi "спальныя месцы" - на сьценах фартэцы разьмясьцiлi адмысловыя драўляныя шчыты, якiя ўтвараюць нешта накшталт шчылiнаў. У iх кажаны i зiмуюць, зьбiўшыя ў купкi. Выглядае гэта прыкладна так:

На нашую просьбу спадарыня Марыя выносiць некалькi жывёлаў на паветра. Кажаны аказваюцца зусiм ня страшнымi, мiлыя такiя пушыстыя зубасьцiкi. Яны сонныя, каб растармашыць iх пасьля сьпячкi трэба хвiлiн 15. Але паляцець яны ня змогуць яшчэ ня хутка. Таму, добра разгледзеўшы рукакрылых, мы заносiм iх назад у фартэцыю i прычэплiваем за драўляны шчыток.

"Мае мышкi" - так пяшчотна называе сваiх гадаванцаў Марыя Дзямянчык. Навукоўцы рэгулярна праведваюць кажаноў, вядуць падлiк i назiраньне. Апекуе кажаноў i ААН - арганiзацыя выдзялiла адмысловы грант на захаваньне зiмавальнай калёнii рукакрылых. У Беларусi сем вiдаў гэтых жывёл занесена ў Чырвоную кнiгу.

Юлiя Дарашкевiч