Цыбульныя кветкі да перасадкi гатовыя

Источник материала:

Нарцысы высаджваюць у грунт раней, чым цюльпаны — з сярэдзiны жнiўня да пачатку верасня. На думку спецыялiстаў, цюльпаны найлепш за ўсё высаджваць з канца жнiўня да пачатку кастрычнiка. Але не трэба зацягваць з перасадкай: калi закапаць цыбулiны цюльпанаў у канцы кастрычнiка, яны альбо вымерзнуць за зiму, альбо вясной вылезуць слабенькiя парасткi, не здольныя зацвiсцi.

А вось гiяцынты, якiя ўкараняюцца хутчэй, чым цюльпаны i нарцысы, звычайна высаджваюць у другой дэкадзе верасня. Штогадовае выкопванне цыбулiн гiяцынтаў з’яўляецца абавязковым мерапрыемствам. Гэта дае магчымасць правесцi агляд цыбулiн, аддзялiць дзеткi для дарошчвання i тыя, якiя добра сфармiравалiся. Цыбулiны ачышчаюць ад зямлi i ўкладваюць у скрынкi з сятчастым дном, пакiдаючы для прасушвання пад павеццю 2-3 днi. Пасля гэтага iх ачышчаюць ад лiшняга шалупiння, наростаў на донцы. Перад пасадкай варта апрацаваць цыбулiны з мэтай прафiлактыкi ад хваробаў i шкоднiкаў.

Прыкладна ў гэты час, як i гiяцынты, высаджваюць цыбульныя касачы. А дробнацыбульныя кветкi (крокусы, мускары, падснежнiкi, познацвет (безвременник) i iнш.) высаджваюць у жнiўнi — вераснi. Лiлеi звычайна гатовыя да высаджвання ўжо праз месяц-паўтара пасля цвiцення. Вельмi важна выкапаць iх цыбулiны ў тэрмiн: калi выкапаць вельмi рана, яны не змогуць выспець, не сфармiруецца покрыўная плеўка. Такiя цыбулiны доўга не захаваеш, ды i на якасцi цвiцення ў наступным сезоне гэта адаб’ецца не самым лепшым чынам. Пакiдаць жа цыбулiны ў зямлi доўга таксама не рэкамендуецца: цыбульнае гняздо рассыплецца i многiя дзеткi згубяцца ў зямлi. Выкапаныя здаровыя цыбулiны пакiньце для прасушвання ў памяшканнi, якое добра праветрываецца. Праз тыдзень-два, калi цыбулiны прасохнуць, акуратна выдалiце сцябло. Сачыце за тым, каб на цыбулiне не было трэшчынак, праз якiя можа пранiкаць iнфекцыя.

Глыбiня ямак для цюльпанаў павiнна быць роўная велiчынi трох цыбулiн, для лiлей можна крыху больш. Сярэдняя адлегласць памiж ямкамi — 10—15 см. На дно ямкi нядрэнна было б насыпаць пясок з перагноем — гэта любяць цыбульныя раслiны. Памятайце, што гэтым раслiнам трэба шчыльная пасадка. Гэта значыць, што цыбулiну не проста ўставiць у ямку, а нiбыта ўкруцiць у зямлю засыпаўшы зверху зямлёй. Перасаджваючы раслiны, абавязкова iх палiце, пры гэтым знiкаюць паветраныя пустоты вакол каранёў, што дапамагае раслiнам хутчэй прыжыцца. Бывалыя кветкаводы раяць прысыпаць кветкавыя пасадкi торфам цi апалымi лiстамi, каб за зiму цыбульныя кветкi не вымерзлi.