Чэкiсты расказваюць пра сябе

Источник материала:

Кнiгу напiсалi супрацоўнiкi Упраўлення, выкарыстоўваючы розныя крынiцы, у тым лiку архiўныя даныя i ўспамiны ветэранаў гэтай службы. І адметнасць яе ў тым, што яна адкрывае малавядомыя старонкi гiсторыi Гомельскага ўпраўлення КДБ за 90-гадовы перыяд яго iснавання, што чытач зможа па-новаму асэнсаваць многiя факты i падзеi, пачынаючы з перыяду станаўлення чэкiсцкiх органаў у суровыя дваццатыя гады мiнулага стагоддзя. А гэта i супрацьстаянне акцыям iншаземных разведак, а барацьба не на жыццё, а на смерць з крымiнальным i палiтычным бандытызмам, у тым лiку з вялiкiмi воiнскiмi фармiраванням Булак-Булаховiча.

З цiкавасцю, напрыклад, будуць чытацца дэталi аперацыi (дарэчы, яны ўпершыню раскрываюцца ў кнiзе) па знiшчэннi арганiзацыi Барыса Савiнкава "Народны саюз абароны радзiмы i свабоды", вядомай як "Сiндыкат-2". Менавiта ў горадзе на Сожы прайшоў першы этап аперацыi. А пазней удзельнiкi "Сiндыката" адыгралi вялiкую ролю ў аперацыi "Трэст", якая закончылася разгромам белаэмiгранцкага руху на чале з генералам А. Куцепавым.

А цi ўсе ведаюць, што легендарныя разведчыкi В. Аляксееў-Жалезнякоў, Н. Валенберг, Н. Эйцiнгон — выхадцы з Гомельскага ГубЧК, i старонкi iх жыцця i дзейнасцi таксама цiкавыя i павучальныя.

Ёсць у кнiзе ўспамiны ўдзельнiкаў спецаперацыi па прадухiленнi дастаўкi гiтлераўцамi хiмiчнай зброi на Усходнi фронт, пра iншыя дзёрзкiя баявыя акцыi, праведзеныя аператыўна-чэкiсцкiмi групамi на тэрыторыi Гомельскай i Палескай абласцей, якiя ў гады Вялiкай Айчыннай вайны апынулiся пад фашысцкiм ботам. У тым лiку i матэрыялы аб атрадах, камандзiры якiх Н. Зябнiцкi, Н. Мiхайлашаў, А. Рабцэвiч, А. Шыхаў былi ўдастоены высокага звання Героя Савецкага Саюза.

Ёсць у ёй i ўспамiны ўдзельнiкаў афганскiх падзей i лiквiдацыi вынiкаў катастрофы на Чарнобыльскай АЭС. Кнiга багата iлюстравана ўнiкальнымi фотаздымкамi i дакументамi, якiя публiкуюцца ўпершыню.