Цэнтрвыбаркам гатовы "вучыцца" на гэтых выбарах

Источник материала:

Учора на пасяджэннi Цэнтральнай камiсii па выбарах i правядзеннi рэспублiканскiх рэферэндумаў 110 народных прадстаўнiкоў у парламенце былi зарэгiстраваныя. Скаргi кандыдатаў аб непрызнаннi вынiкаў выбараў, якiя паступiлi ў ЦВК, перанакiравалi акруговым камiсiям, паколькi гэта ў iх кампетэнцыi i "звязана з праверкай вялiкага фактычнага матэрыялу", як адзначыла старшыня Цэнтрвыбаркама Лiдзiя Ярмошына. І ў вынiку нязгоды з рашэннем акруговай камiсii, яго можна аспрэчваць у Цэнтрвыбаркаме. Яна падкрэслiла таксама, што разгляд скаргаў не з’яўляецца перашкодай для падвядзення вынiкаў выбараў.

— Мы маем дастаткова шмат iнфармацыi, значна больш, чым кожны прадстаўнiк палiтычнай партыi, паколькi ўсё ж такi ён мае тую iнфармацыю, якая прадастаўлена членамi пэўнай партыi, — адзначыла Лiдзiя Ярмошына ў гутарцы з журналiстамi. — Сённяшняе рашэнне прымалася ўсвядомлена менавiта на падставе гэтай iнфармацыi. Цалкам верагодна, што мы атрымаем яшчэ нейкiя асаблiвасцi, якiя нам дасць разгляд скаргаў у акруговых выбарчых камiсiях. Пры ўсiм тым, што скаргi iдуць па 20 выбарчых акругах, iх усё ж такi не так шмат. 24 грамадзянiны звярнулiся са скаргамi, а ў выбарах удзельнiчалi 263 кандыдаты. Адпаведна астатнiя 130 чалавек (110 абраных дэпутатаў задаволеныя выбарамi "па ўмаўчаннi". — Аўт.) згодныя з вынiкамi выбараў.

Старшыня Цэнтрвыбаркама прызнала недахопам, што прадстаўнiкi ўчастковых камiсiй "часам не вельмi добра адкрываюцца, i менавiта гэта выклiкала перш за ўсё прэтэнзii АБСЕ". Аднак, як яна сказала, "пасылы зверху iшлi наконт таго, што назiральнiкам павiнен быць прадастаўлены поўны аб’ём iнфармацыi, i СМI неаднаразова транслявалi такiя мае звароты". Лiдзiя Ярмошына рэзюмавала, што выбары даюць урокi i Цэнтрвыбаркам будзе працаваць над памылкамi.

— Дрэнна, што не ўвайшлi ў парламент прадстаўнiкi апазiцыйных палiтычных партый, — заўважыла старшыня ЦВК. — Зразумела, павiнен быць прадстаўлены i другi бок, бо гэта дае разнастайнасць палiтычнаму жыццю.

Першае пасяджэнне Палаты прадстаўнiкоў чацвёртага склiкання прызначана на 27 кастрычнiка, а сенатары прыступяць да працы, мяркуецца, на тым жа тыднi — 31 кастрычнiка. Вынiкi iх выбараў у Савет Рэспублiкi, дарэчы, будуць падведзеныя на чарговым пасяджэннi Цэнтрвыбаркама 14 кастрычнiка. У той жа дзень прызначаць дадатковыя выбары ў Савет Рэспублiкi з-за таго, што адзiн з прэтэндэнтаў раней зняў сваю кандыдатуру. I да гэтага пасяджэння ўжо будуць гатовыя рашэннi акруговых камiсiй па скаргах кандыдатаў у дэпутаты аб непрызнаннi вынiкаў выбараў. Паўнамоцтвы членаў ЦВК з правам дарадчага голасу да гэтага часу будуць скончаныя i яны змогуць удзельнiчаць у пасяджэннi толькi ў якасцi назiральнiкаў.