Спрошчана працэдура арэнды памяшканняў

Источник материала:

Адна з праблемаў, з якой рана цi позна сутыкаецца практычна кожны суб’ект прадпрымальнiцкай дзейнасцi, — гэта неабходнасць арэнды памяшкання для вытворчай дзейнасцi або размяшчэння офiса. У большасцi выпадкаў патэнцыяльныя арандатары сустракаюць нежаданне арэндадаўцаў заключаць дагаворы арэнды памяшканняў на працяглыя тэрмiны. Пры гэтым адна з прычын адмовы ў заключэннi працяглых дагавораў арэнды — неабходнасць дзяржаўнай рэгiстрацыi дагавораў арэнды, заключаных на тэрмiн звыш аднаго года, i праходжання даволi забюракратызаванай працэдуры такой рэгiстрацыi. Таму на практыцы ў арэнду (субарэнду) прадастаўляюцца плошчы, як правiла, толькi на 11 месяцаў.

Такое становiшча, з аднаго боку, не дае магчымасцi арандатарам арганiзаваць стабiльную работу, а з другога — з’яўляецца спрыяльнай глебай для розных злоўжыванняў.

Для вырашэння гэтай праблемы кiраўнiк дзяржавы падпiсаў дэкрэт, якiм устаноўлены мiнiмальны тэрмiн арэнды (субарэнды) капiтальных пабудоў (будынкаў, збудаванняў), iзаляваных памяшканняў, што знаходзяцца як у дзяржаўнай, так i ў прыватнай уласнасцi, — тры гады. На тэрмiн менш як тры гады дагаворы могуць быць заключаны толькi са згоды арандатараў.

Дадаткова для зняцця залiшнiх бюракратычных бар’ераў i стымулявання суб’ектаў да заключэння доўгатэрмiновых дагавораў дэкрэтам адменена дзяржаўная рэгiстрацыя дагавораў арэнды, субарэнды нерухомай маёмасцi i бязвыплатнага карыстання ёю, уносiмых у гэтыя дагаворы змяненняў (дапаўненняў) i скасавання такiх дагавораў. Такiя дагаворы будуць лiчыцца заключанымi з дня iх падпiсання бакамi.

На арэндадаўцаў (пазыкадавальнiкаў) ускладаецца толькi адзiн абавязак: праiнфармаваць на працягу дзесяцi дзён у адвольнай форме тэрытарыяльную арганiзацыю па дзяржаўнай рэгiстрацыi нерухомай маёмасцi, правоў на яе i здзелак з ёю (па месцы знаходжання нерухомай маёмасцi) аб заключаным дагаворы, унясеннi ў яго змяненняў або скасаваннi, для ўнясення запiсу ў рэгiстр. Пры гэтым за ўнясенне гэтага запiсу дзяржаўная пошлiна i (або) плата з суб’ектаў гаспадарання спаганяцца не будзе. Уся працэдура — бясплатная.