ЗАКОН ПАВIНЕН АДПАВЯДАЦЬ ПАТРАБАВАННЯМ ЖЫЦЦЯ

Источник материала:

Паважаныя дэпутаты, запрошаныя, журналiсты!

Першая сесiя Палаты прадстаўнiкоў Нацыянальнага сходу Рэспублiкi Беларусь чацвёртага склiкання завяршае сваю работу. Праведзена 10 пасяджэнняў Палаты прадстаўнiкоў, у тым лiку два сумесныя з Саветам Рэспублiкi Нацыянальнага сходу Рэспублiкi Беларусь, разгледжана 44 пытаннi парадку дня.

Падводзячы вынiкi, неабходна адзначыць, што ўсе арганiзацыйныя пытаннi вырашаны аператыўна i дэмакратычна: выбрана кiраўнiцтва Палаты прадстаўнiкоў, сфармiраваны яе Савет, пастаянныя камiсii, iншыя рабочыя органы.

З улiкам неабходнасцi комплекснага вырашэння задач, якiя стаяць перад Палатай прадстаўнiкоў, асаблiвая ўвага была ўдзелена наладжванню кантактаў з калегамi з Савета Рэспублiкi, выбудоўванню дакладнай сiстэмы ўзаемадзеяння з Адмiнiстрацыяй Прэзiдэнта Рэспублiкi Беларусь, Урадам Рэспублiкi Беларусь, мiнiстэрствамi i iншымi ўдзельнiкамi заканатворчага працэсу. У мэтах удасканалення заканадаўчай дзейнасцi пры Савеце Палаты прадстаўнiкоў сфармiравана рабочая група па арганiзацыi вывучэння дэпутатамi практыкi прымянення заканадаўства i ўзаемадзеяння з мясцовымi органамi ўлады.

Усяго ў ходзе сесii прынята 10 законапраектаў у першым чытаннi, 10 — у другiм, у тым лiку 3 законапраекты аб ратыфiкацыi мiжнародных дагавораў. Разгледжаны i прыняты да ведама 3 дэкрэты Прэзiдэнта Рэспублiкi Беларусь.

Адным з найбольш важных вынiкаў заканадаўчай дзейнасцi стала прыняцце блока законапраектаў у сацыяльнай сферы.

У галiне пенсiйнага заканадаўства прыняты праект Закона "Аб унясеннi дапаўненняў i змяненняў у некаторыя законы Рэспублiкi Беларусь па пытаннях дзяржаўнага сацыяльнага страхавання i занятасцi насельнiцтва". Карэкцiроўка нормаў заканадаўства ў гэтай сферы абумоўлена ўвядзеннем прафесiйнага пенсiйнага страхавання i прызначана вырашыць пытаннi фармiравання крынiц фiнансавання датэрмiновых пенсiй за работу ў шкодных умовах працы. Выкарыстанне пакетнага прынцыпу пры падрыхтоўцы законапраекта дало магчымасць унесцi папраўкi не толькi ў базавы Закон "Аб пенсiйным забеспячэннi", але i ў iншыя законы па пытаннях сацыяльна-працоўных адносiнаў.

Асаблiвую сацыяльную важнасць мае прыняты праект Закона "Аб сацыяльнай абароне грамадзян, якiя пацярпелi ад катастрофы на Чарнобыльскай АЭС, iншых радыяцыйных аварый". У iм дакладна вызначаны катэгорыi грамадзян, на якiх распаўсюджваюцца меры сацыяльнай абароны, прадугледжана сiстэмнае i комплекснае рэгуляванне льготаў, правоў i гарантый для грамадзян, пацярпелых ад катастрофы на Чарнобыльскай АЭС, iншых радыяцыйных аварый.

У мэтах рэалiзацыi канстытуцыйнага права грамадзян Рэспублiкi Беларусь на добрае навакольнае асяроддзе прыняты праект Закона "Аб ахове атмасфернага паветра". Сярод яго навацый — стварэнне прававых асноў для ўкаранення i выкарыстання найлепшых даступных тэхнiчных метадаў, якiя даюць магчымасць забяспечыць дасягненне ўстаноўленых нарматываў якасцi атмасфернага паветра, а таксама спрашчэнне сiстэмы адмiнiстравання пры атрыманнi дазвольных дакументаў на выкiды забруджвальных рэчываў у атмасфернае паветра.

Сярод сацыяльных законапраектаў трэба адзначыць i прыняты ў першым чытаннi праект Закона "Аб унясеннi дапаўненняў i змяненняў у Закон Рэспублiкi Беларусь "Аб лекавых сродках".

Аператыўна праводзiлася работа над законапраектамi, накiраванымi на павышэнне ўстойлiвасцi фiнансавай сiстэмы, далейшую лiбералiзацыю эканомiкi. Размова iдзе перш за ўсё аб прынятых у першым чытаннi праектах законаў "Аб унясеннi змяненняў i дапаўненняў у Закон Рэспублiкi Беларусь "Аб валютным рэгуляваннi i валютным кантролi" i "Аб унясеннi змяненняў i дапаўнення ў некаторыя кодэксы Рэспублiкi Беларусь па пытаннях накладання арышту на грашовыя сродкi на рахунках, у банкаўскiх укладах (дэпазiтах) i прыпыненнi аперацый па рахунках". Iх нормы прызначаны садзейнiчаць эфектыўнаму функцыянаванню грашова-крэдытнай сiстэмы, росту iнвестыцый i зберажэнняў, абароне эканамiчных iнтарэсаў нашай дзяржавы.

У мэтах развiцця цывiлiзаваных эканамiчных адносiнаў i фармiравання прывабнага дзелавога асяроддзя прыняты праект Закона Рэспублiкi Беларусь "Аб таварных бiржах". Канструктыўнай рабоце над законапраектам садзейнiчала правядзенне Пастаяннай камiсiяй Палаты прадстаўнiкоў па прамысловасцi, палiўна-энергетычным комплексе, транспарту, сувязi i прадпрымальнiцтве выязнога пасяджэння, прысвечанага вывучэнню дзейнасцi таварных бiржаў.

У гэтым блоку законапраектаў неабходна таксама адзначыць прыняты ў першым чытаннi праект Закона "Аб унясеннi дапаўненняў i змяненняў у некаторыя законы Рэспублiкi Беларусь па пытаннях iнтэлектуальнай уласнасцi", накiраваны на ўдасканаленне рэгулявання адносiнаў, звязаных з рэгiстрацыяй, прававой абаронай i выкарыстаннем таварных знакаў i знакаў абслугоўвання, абаронай правоў iх уладальнiкаў i спыненнем нядобрасумленнай канкурэнцыi ў гэтай галiне.

Узмацненне эканамiчнай нестабiльнасцi ў свеце патэнцыяльна нясе ў сабе верагоднасць росту палiтычных пагроз. У мэтах iх прадухiлення ў ходзе сесii разгледжаны шэраг законапраектаў у сферы нацыянальнай бяспекi i абароны.

У другiм чытаннi прыняты законапраекты, накiраваныя на ўдасканаленне заканадаўства па пытаннях дзейнасцi пракуратуры Рэспублiкi Беларусь, дзяржаўнага i мабiлiзацыйнага матэрыяльных рэзерваў. Паспяхова прайшлi этап першага чытання праекты законаў "Аб органах i падраздзяленнях па надзвычайных сiтуацыях Рэспублiкi Беларусь", "Аб дзяржаўнай ахове", а таксама законапраекты, якiя прадугледжваюць унясенне змяненняў i дапаўненняў у Закон "Аб Узброеных Сiлах Рэспублiкi Беларусь" i ў некаторыя кодэксы Рэспублiкi Беларусь па пытаннях абароны дзяржаўных сакрэтаў.

Прадаўжалася работа над удасканаленнем заканадаўства ў галiне дзяржаўнага будаўнiцтва. Дэпутаты разгледзелi i прынялi ў першым чытаннi праект Закона "Аб унясеннi змяненняў i дапаўненняў у Закон Рэспублiкi Беларусь "Аб статусе дэпутата мясцовага Савета дэпутатаў".

Унесены ўклад i ў фармiраванне мiжнароднай дагаворна-прававой базы Рэспублiкi Беларусь. Прыняты рашэннi аб ратыфiкацыi Мемарандума аб узаемаразуменнi памiж Урадам Рэспублiкi Беларусь i Урадам Дзяржавы Катар па пытаннях супрацоўнiцтва ў галiне бяспекi, мiжурадавага Пагаднення з Сацыялiстычнай Рэспублiкай В’етнам аб супрацоўнiцтве ў галiне каранцiну i аховы раслiн, а таксама Пагаднення памiж Рэспублiкай Беларусь i Камiсiяй Еўрапейскiх супольнiцтваў аб заснаваннi, прывiлеях i iмунiтэтах Прадстаўнiцтва Камiсii Еўрапейскiх супольнiцтваў у Рэспублiцы Беларусь.

У мэтах забеспячэння такога важнага напрамку дзейнасцi Палаты прадстаўнiкоў, як мiжпарламенцкае супрацоўнiцтва, у ходзе сесii праведзена работа па фармiраваннi нацыянальных дэлегацый у 12 мiжнародных парламенцкiх арганiзацыях. Завяршаецца стварэнне камiсiй i рабочых груп па супрацоўнiцтве на двухбаковай аснове з парламентамi 41 дзяржавы свету.

Асноўным вынiкам 35-й сесii Парламенцкага Сходу Саюза Беларусi i Расii, якая прайшла ў г. Мiнску 16 снежня 2008 года, стала вырашэнне арганiзацыйных пытанняў, звязаных з абнаўленнем дэпутацыi Нацыянальнага сходу Рэспублiкi Беларусь у Парламенцкiм Сходзе.

Дэпутаты актыўна ўключылiся ў работу iнтэграцыйных органаў на постсавецкай прасторы. Дэлегацыя Парламента прыняла ўдзел у мерапрыемствах Мiжпарламенцкай Асамблеi дзяржаў — удзельнiц Садружнасцi Незалежных Дзяржаў, Мiжпарламенцкай Асамблеi Еўразiйскага эканамiчнага супольнiцтва i Парламенцкай Асамблеi Арганiзацыi Дагавора аб калектыўнай бяспецы, якiя праходзiлi 24-25 лiстапада 2008 года ў г. Санкт-Пецярбургу. Удзел у гэтых мерапрыемствах быў выкарыстаны для правядзення двухбаковых сустрэч з кiраўнiкамi парламенцкiх дэлегацый Арменii, Малдовы, Расii, Таджыкiстана, у ходзе якiх абмеркаваны пытаннi развiцця двухбаковага ўзаемадзеяння i ўзаемнай падтрымкi ў мiжпарламенцкiх арганiзацыях.

Неабходна таксама адзначыць плённы ўдзел дэпутатаў Палаты прадстаўнiкоў у 32-м пленарным пасяджэннi Генеральнай асамблеi Парламенцкай Асамблеi Чарнаморскага эканамiчнага супрацоўнiцтва, якое праходзiла 4-5 лiстапада 2008 года ў Рэспублiцы Малдова, а таксама кантакты з Парламенцкай Асамблеяй АБСЕ, Парламенцкай структурай Цэнтральнаеўрапейскай iнiцыятывы, Паўночным Саветам.

Адбыўся вiзiт у Рэспублiку Беларусь парламенцкай дэлегацыi Боснii i Герцагавiны на чале са Старшынёй Палаты прадстаўнiкоў Парламенцкай асамблеi Боснii i Герцагавiны Нiка Лазанчычам. Праведзеныя перагаворы, як i дасягнутыя дамоўленасцi, паказалi зацiкаўленасць бакоў у развiццi супрацоўнiцтва па ўсiм спектры двухбаковых адносiнаў.

У лiстападзе-снежнi 2008 года ў Палаце прадстаўнiкоў адбылося 16 сустрэч з замежнымi парламентарыямi, палiтыкамi i дыпламатамi, у тым лiку з Прэм’ер-мiнiстрам Сiрыi М.Наджы аль-Отры, Мiнiстрам замежных спраў Iрана М.Матакi, парламентарыямi Славакii, пасламi В’етнама, Карэi, Iрана, з кiраўнiком Офiса АБСЕ у Мiнску Гансам-Ёганам Шмiтам, з дэлегацыямi дзелавых колаў Фiнляндскай Рэспублiкi i Сусветнай арганiзацыi скаўцкага руху.

Асаблiва хачу адзначыць работу, праведзеную ў выбарчых акругах. Менш як за два месяцы дэпутаты прынялi 2187 грамадзян, правялi больш як 370 сустрэч у працоўных калектывах. Разгледжаны 1982 звароты выбаршчыкаў. Дэпутаты прынялi ўдзел у 96 пасяджэннях мясцовых выканаўчых камiтэтаў, 60 сесiях мясцовых Саветаў дэпутатаў.

I ўсё ж, паважаныя калегi, асноўная работа ў нас наперадзе. Ужо сёння на разглядзе ў пастаянных камiсiях знаходзiцца 27 праектаў законаў.

У мiжсесiйны перыяд неабходна завяршыць работу над падрыхтоўкай шэрагу законапраектаў да разгляду ў другiм чытаннi. Сярод iх асаблiва адзначу праект Закона "Аб унясеннi змяненняў i дапаўнення ў некаторыя законы Рэспублiкi Беларусь па пытаннях сацыяльнай абароны грамадзян, якiя пацярпелi ад катастрофы на Чарнобыльскай АЭС".

У адпаведнасцi з планам падрыхтоўкi законапраектаў у Палату прадстаўнiкоў унесены праект Закона "Аб асновах дзяржаўнай маладзёжнай палiтыкi". Чакаецца ўнясенне новых дакументаў. Сярод iх — законапраект, якi прадугледжвае папраўкi ў некаторыя законы па пытаннях прававога становiшча замежных грамадзян i асобаў без грамадзянства ў Рэспублiцы Беларусь, а таксама па пытаннях грамадзянства Рэспублiкi Беларусь.

Самая сур’ёзная ўвага павiнна быць удзелена ўдасканаленню грамадзянскага заканадаўства, заканадаўства аб прадпрымальнiцкай, гаспадарчай (эканамiчнай) дзейнасцi. Нам трэба будзе разгледзець законапраекты аб унясеннi змяненняў i дапаўненняў у Грамадзянскi кодэкс Рэспублiкi Беларусь па пытаннях дзейнасцi ўнiтарных прадпрыемстваў, садоўнiцкiх таварыстваў, долевага будаўнiцтва, у законы "Аб асновах транспартнай дзейнасцi", "Аб гаспадарчых таварыствах", а таксама праект Закона "Аб электронным дакуменце i электронным лiчбавым подпiсе".

У сферы заканадаўства аб фiнансава-крэдытнай сiстэме неабходна сканцэнтраваць намаганнi на падрыхтоўцы новай рэдакцыi Закона "Аб дэклараваннi фiзiчнымi асобамi даходаў, маёмасцi i крынiц грашовых сродкаў".

У галiне заканадаўства аб абароне i нацыянальнай бяспецы чакаецца ўнясенне праекта Закона "Аб статусе ваеннаслужачых".

Для таго каб якасна падрыхтаваць гэтыя законапраекты, трэба ўжо цяпер, не трацячы часу, уключыцца ў работу над iмi. Гэта дасць магчымасць наперад зняць многiя праблемы, забяспечыць аператыўнае прыняцце запатрабаваных грамадствам прававых рашэнняў.

Насычанай будзе i мiжнародная дзейнасць.

У лютым 2009 года ў г. Мiнску плануецца правядзенне 36-й сесii Парламенцкага Сходу Саюза Беларусi i Расii.

Чакаюцца вiзiты ў Рэспублiку Беларусь парламенцкiх дэлегацый Арменii, Лiвана, Фiнляндыi, а таксама дэлегацый ПАСЕ, Паўночнага Савета, Рабочай групы ПА АБСЕ па Беларусi. Прапрацоўваюцца вiзiты парламенцкiх дэлегацый Рэспублiкi Беларусь у В’етнам, Iран, Украiну.

Дэпутаты возьмуць удзел у зiмовай сесii ПА АБСЕ i мерапрыемствах па лiнii Мiжпарламенцкай Асамблеi праваслаўя.

Плануецца правядзенне другога сумеснага семiнара дэлегацыi Нацыянальнага сходу Рэспублiкi Беларусь у ПА АБСЕ i Рабочай групы ПА АБСЕ па Беларусi па iнвестыцыйнай тэматыцы.

На заканчэнне, паважаныя калегi, дазвольце падзякаваць вам за плённую работу i павiншаваць усiх з надыходзячым Новым годам i Каляднымi святамi. Жадаю вам моцнага здароўя, дабрабыту, поспехаў i ўдачы ва ўсiх справах.