Рызыкуюць за метал

Источник материала:

Амаль што кожны дзень у Гомельскай вобласцi мiлiцыянеры затрымлiваюць грамадзян, якiя робяць спробы вывезцi вялiкiя партыi лому чорных i каляровых металаў за мяжу нашай краiны без усялякiх дакументаў. Часцей за ўсё перавозчыкаў ловяць уздоўж мяжы з Расiйскай Федэрацыяй: у Добрушскiм, Веткаўскiм, Чачэрскiм або Рагачоўскiм раёнах. Вось апошнi "ўлоў". Позна вечарам мiлiцыянеры з Чачэрска на аўтадарозе Буда-Кашалёва—Чачэрск затрымалi МАЗ, якi належыць жыхару Бранскай вобласцi i якiм кiраваў непрацуючы жыхар вёскi Свяцiлавiчы Веткаўскага раёна. У машыне перавозiлася 6,5 тоны лому чорнага металу без дакументаў. На свiтанку ў выселенай вёсцы Ачаса-Рудня Добрушскага раёна затрыманы КАМАЗ, у якiм непрацуючы мазыранiн спрабаваў вывезцi 16 тон лому. Напярэдаднi ноччу каля вёскi Перарост таго ж раёна супрацоўнiкi ўзвода па ахове тэрыторый радыеактыўнага забруджвання мясцовага РАУС затрымалi ЗІЛ, у якiм непрацуючы жыхар вёскi Рогi Гомельскага раёна перавозiў 8 тон лому чорнага металу. У Чачэрскiм раёне ранiцай затрымана аўтамашына "IФА-в50", у якой жыхар Рагачова, зразумела, без дакументаў, перавозiў каля 15 тон лому. 30 тон было ў грузавым аўтамабiлi "МАН 26unl" з прычэпам, якi належыць жыхару Навазыбкава Бранскай вобласцi. Перавозчыкам каштоўнага грузу быў гамяльчанiн: машыну затрымалi каля прапускнога пункта Селiшча перад самай мяжой. Вiдаць, ёсць сэнс рызыкаваць.

Патэлефанаваў невядомы "добразычлiвец" i сказаў, што ў Малькавiчах у яго суседа ёсць незарэгiстраваная паляўнiчая стрэльба. Аператыўная група выехала на месца. Стрэльба канфiскаваная, а на гаспадара складзены пратакол. Мiлiцыянераў стрэльба здзiвiла: яна амерыканскай вытворчасцi 1901 года выпуску.