Молодое пополнение музея

Дырэктар установы Раіса Казановіч шчыра прызнаецца, што музею неставала маладой змены. Тут даволі вопытны калектыў, многія работнікі аддалі любімай справе больш за два і тры дзесяцігоддзі.

— Нам вельмі важна захаваць пераемнасць пакаленняў, каб музей развіваўся, — заўважае Раіса Генадзьеўна. – Мы былі зацікаўленыя менавіта ў спецыялістах музейнай сферы, якія з разуменнем паставяцца да кожнага экспаната і будуць усведамляць, што кожны з іх з’яўляецца часткай пэўнай гістарычнай эпохі. Для пачынаючых спецыялістаў важна ўзбагаціць багаж ведаў, а вопытныя, спадзяюся, атрымаюць ад іх зарад маладосці і крэатыву, якога не пазычаць нашым навічкам. На старце прафесійнага шляху ім дапамагаюць куратары – загадчыца аддзела Вольга Шылько і старшы навуковы супрацоўнік Алёна Дурко.

Марыя Мячкоўская, Канстанцін Скур’ят, Дар’я Бярозка і Вадзім Ланец – выпускнікі аддзялення «Музейная справа» сталічнага ўніверсітэта культуры і мастацтваў. Дзяўчаты спецыялізаваліся на музеязнаўстве, хлопцы – на менеджменце па гісторыка-культурнай спадчыне і турызме. Перш чым размеркавацца ў наш абласны краязнаўчы, яны пабывалі тут і пераканаліся, што менавіта аб такой рабоце марылі. Маладыя спецыялісты адзначаюць, што ў музеі шмат магчымасцей для прафесійнага развіцця, кар’ернага росту. Ды і горад перспектыўны для жыцця.

Маша і Косця родам з Вілейкі, пазнаёміліся ва ўніверсітэце, цяпер працуюць у адным калектыве. Дарэчы, Канстанцін закончыў ВНУ з дыпломам з адзнакай. Кіраўніцтва музея ўжо зацікаўлена ў тым, каб здольны хлопец прадоўжыў навучанне ў магістратуры. Цікава, што ў музейную справу ён прыйшоў па парадзе свайго… рэпетытара па гісторыі. У абласным краязнаўчым Канстанцін будзе займацца навукова-даследчай работай. Як і яго аднакурснік Вадзім Ланец. Гэты малады спецыяліст родам з Будслава. Марыя Мячкоўская замацавалася ў аддзеле методработы, а Дар’я Бярозка з Глыбокага – у фондавым. Але маладым спецыялістам цікава ў музеі абсалютна ўсё.

Навічкі паспрабавалі ўжо сябе ў якасці экскурсаводаў, дапамагалі ствараць выстаўку мастацкіх вырабаў са шкла, што нядаўна адкрылася ў музеі. Цяпер прымаюць удзел у арганізацыі выстаўкі твораў нашага слыннага мастака Мікалая Аўчыннікава, якая ў хуткім часе будзе ладзіцца ў Мядзеле. Маладыя спецыялісты былі ў камандзіроўках у Заслаўі, Барысаве, знаёміліся з работай аналагічных устаноў. А Канстанцін Скур’ят нават пераймаў вопыт у Маскве. Ён заўважыў, што расійскім калегам ёсць чаму павучыцца ў нас. У маскоўскіх музеях зроблены ўпор на інтэрактыў, а нашы спецыялісты з наведвальнікамі больш працуюць «жыўцом».

Дырэктар абласнога краязнаўчага адкрыта гаворыць і пра тое, што з-за невялікіх зарплат маладыя спецыялісты не вельмі ахвотна затрымліваюцца ў бюджэтных установах культуры. З іншага боку, трэба вучыцца зарабляць грошы. У музейшчыкаў ёсць мноства магчымасцей прыцягнуць увагу наведвальнікаў неардынарнымі праектамі і ў выніку падмацаваць фінансавую базу. На гэты конт у пачынаючых і вопытных работнікаў ужо ёсць цікавыя ідэі. Варта заўважыць і тое, што моладзь забяспечылі жыллём — дзякуючы супрацоўніцтву з кіраўніцтвам гандлёва-эканамічнага каледжа выдзелілі двухмесныя пакоі ў інтэрнаце навучальнай установы. У наступным годзе ў музеі чакаюць чарговае папаўненне: нашых землякоў, якія ў хуткім часе стануць выпускнікамі гістарычнага факультэта Белдзяржуніверсітэта.   

Фота: Аляксей ПЛАТКО.