Пажыць для сябе ці нарадзіць "хоць бы адно"?
18.01.2012
—
Новости Общества
|
Ужо з наступнага года ў нашай краіне значна знізіцца колькасць жанчын дзетароднага ўзросту, што тлумачыцца аб'ектыўна малой колькасцю дзяўчынак, народжаных у 1990-я. Наогул рэпрадуктыўныя паводзіны, інстытут шлюбу, сям'я перажываюць на працягу апошніх двух дзесяцігоддзяў моцную трансфармацыю, асаблівасці якой вывучаюць і аналізуюць спецыялісты. Апошнія кажуць, што новыя працэсы і новыя сацыяльныя інстытуты патрабуюць ад дзяржаўнай палітыкі ўзважанага падыходу — пераадолення спакусы выключна адраджэння і падтрымання традыцыйных нормаў і каштоўнасцяў, улічвання нехарактэрных для мінулага ўстановак і паводзін. У свеце, напрыклад, з'явіўся такі рух, як чайлдфры ("свабодныя ад дзяцей"). Размова ідзе пра людзей, якія свядома не жадаюць мець дзяцей, а не адкладваюць дзетанараджэнне на больш позні тэрмін. Ці атрымае гэты рух развіццё ў нашай краіне?..
Паводле слоў намесніка начальніка ўпраўлення народанасельніцтва, гендарнай і сямейнай палітыкі Міністэрства працы і сацыяльнай абароны Рэспублікі Беларусь Марыны АРЦЁМЕНКІ, у нашай краіне не праводзіліся спецыяльныя даследаванні па выяўленні сем'яў, якія наўмысна адмаўляюцца ад нараджэння дзяцей. Аднак яшчэ ў 2008 годзе ў нас даследаваліся рэпрадуктыўныя ўстаноўкі, і тады высветлілася, што 45 працэнтаў беларускіх сем'яў — гэта сем'і з няпоўнагадовымі дзецьмі і што амаль 24 працэнты сем'яў дзяцей не маюць (у параўнанні з 1999 годам гэта на 1 працэнт больш). Пры гэтым калі ў нас размова ідзе пра бяздзетныя сем'і, то маюцца на ўвазе ўсё ж такі патэнцыйныя бацькі, якія проста адкладваюць дзетанараджэнне па нейкай прычыне. Галоўным чынам, называюцца "нізкі ўзровень сямейнага даходу, яго зніжэнне пры нараджэнні дзіцяці" і "недахват дзяржаўнай падтрымкі для сем'яў з дзецьмі". Значна радзей называюцца праблемы са здароўем, адсутнасць узаемаразумення і канфлікты з партнёрам. "Жаданне жыць толькі для сябе" адзначылі ўсяго 2 працэнты рэспандэнтаў. Некаторыя сучаснікі строга падзяляюць для сябе паняцці шлюбу і нараджэння дзяцей. Тэлевядучы і прадзюсар Уладзімір МАКСІМКАЎ кажа: "Я лічу, што інстытут шлюбу дакладна зжыў сябе. Пакуль дваім добра разам, яны могуць жыць разам, калі стала не так добра — можна проста разысціся... Што да дзяцей, то не скажу, што я праціўнік дзяцей. Думаю, ніхто не стане адкрыта выказвацца супраць дзяцей у краіне, дзе пануюць моцныя патрыярхальныя ўстоі, дзе сям'я — вышэй за ўсё... Іншая рэч, дзіця абавязкова павінна быць плодам вялікага кахання. І абавязкова спланаваным. Бо гэта высокая ступень адказнасці... І перш чым нараджаць новых, заўсёды трэба падумаць, што рабіць з тымі, хто ўжо нарадзіўся, — з тымі, ад каго адмовіліся. Я асабіста хачу мець дзяцей з каханай жанчынай, іхачу, каб у дзяцей была магчымасць паўнацэннага жыцця". Нягледзячы на тое, што пакуль мы многае пераймаем у Еўропы (у тым ліку і больш познія ўступленне ў шлюб і нараджэнне дзяцей), наўрад ці ў Беларусі знойдзецца больш-менш істотная колькасць паслядоўнікаў руху чайлдфры. І на гэта ёсць свае дакладныя прычыны, мяркуе вядучы кансультант Мінскага гарадскога цэнтра сацыяльнага абслугоўвання сям'і і дзяцей Анатоль АЛАДЗІН. Па-першае, такой прыхільнасці будзе перашкаджаць катэгарычна адмоўнае стаўленне грамадства да бяздзетнай жанчыны: маўляў, у яе не хапіла розуму не толькі мужыка сабе знайсці, але і дзіця нарадзіць (што характэрна, гэта выключна жаночы стэрэатып — мужчыны так не думаюць). Па-другое, шэрагі чайлдфры могуць папоўніць і тыя, хто вымушаны змірыцца з аб'ектыўнай немагчымасцю мець дзяцей. Для некага сказаць "не хачу" ўсё ж такі прасцей, чым "не магу". Колькі будзе дзяцей і калі яны павінны з'явіцца — стане актуальным тады, калі ўдасца вырашыць прынцыповае пытанне трываласці сям'і. На жаль, ні хлопчыкаў, ні дзяўчынак ніхто не вучыў і не вучыць жыць у сям'і. А сям'я, дарэчы, жыве па сваіх законах і паддаецца "вывучэнню". У рэшце рэшт усе сем'і праходзяць праз крызісныя этапы, аднак не ўсе пасля іх выжываюць... Матэрыяльнае заахвочванне большага дзетанараджэння не вырашае праблему трываласці сям'і і дэмаграфічнай бяспекі. Гэта толькі спрыяе замацаванню ўтрыманскіх настрояў у грамадстве, аднак пакуль яны ў нас актыўна культывуюцца... А хто, як і калі падступіцца да тэмы адказнасці кожнага з нас за свой лёс, не гаворачы ўжо аб такіх "дробязях", як выбар партнёра і нараджэнне ад яго дзяцей? Той, хто сёння сцвярджае, што шлюб зжыў сябе, як правіла — не жанчына. Некалі акты грамадзянскага стану пачалі фіксавацца выключна для таго, каб мужчына ведаў, каму ён перадае сваю спадчыну. Сёння ж менавіта шлюб можа абараніць жанчыну ад мужчынскага самавольства, які сёння горача пакахаў адну, а заўтра — другую. Абедзве засталіся з дзецьмі. Хто будзе "несці адказнасць" за іх? Неабходнасць працягнення роду, каштоўнасць дзяцей застаюцца пакуль безумоўнымі. Адначасова з паступовым ростам эканамічнага развіцця дзяцей у сем'ях будзе нараджацца менш, і гэта будуць больш свядомыя нараджэнні. Няхай нават пры гэтым і з'явіцца катэгорыя паслядоўнікаў чайлдфры, але наўрад ці іх колькасць будзе імкліва расці і істотна паўплывае на агульную дэмаграфічную карціну. Відавочна, што ні грамадству, ні бацькам дзеці не патрэбны любой цаной. Як ні круці, тэма сям'і і дзяцей застанецца для кожнага з нас пытаннем асабістага выбару. Святлана БАРЫСЕНКА. Чтобы разместить новость на сайте или в блоге скопируйте код:
На вашем ресурсе это будет выглядеть так
Ужо з наступнага года ў нашай краіне значна знізіцца колькасць жанчын дзетароднага ўзросту, што тлумачыцца аб'ектыўна малой колькасцю дзяўчынак, народжаных у...
|
|