Разам — мы сiла!

Источник материала:

Працоўнае лета-2006

Усе цяжкасцi работы забываюцца, у памяцi застаюцца светлыя ўспамiны аб праведзеных днях у дружным i вясёлым калектыве.

— У будаўнiчы атрад я запiсаўся, каб зарабiць грошай, — расказвае студэнт 3 курса факультэта радыёфiзiкi i электронiкi Дзмiтрый РАДЗЮК. — Канешне, класцi бетонную падлогу было нялёгка. Затое даведаўся, як гэта робiцца. Для мяне сталi галоўнымi тыя адносiны, тая калектыўная атмасфера, якая панавала ў нашым атрадзе. I загарэлi мы на будаўнiчых пляцоўках, быццам з курорта прыехалi.

— Гэта былi адны з самых лепшых дзён у маiм жыццi, — дзелiцца студэнтка факультэта журналiстыкi пяцiкурснiца Ганна ЦIМАФЕЕВА. — У мяне з’явiлася шмат сяброў i знаёмых. Я разлiчвала на большы заробак. А цяпер разумею, што гэта не самае галоўнае. Асабiста для сябе я набыла значна большае, зразумела, што калi мы разам — мы сiла!

У БДУ традыцыя наладжвання працоўных семестраў налiчвае ўжо пяць дзесяцiгоддзяў. Сёлета на розных аб’ектах працавалi каля 800 студэнтаў. Яны дапамагалi будаваць гасцiнiцу «Еўропа», працавалi на цяплiчным комплексе ў вёсцы Багатырова Мiнскай вобласцi, падрыхтоўвалi да новага навучальнага года студэнцкiя iнтэрнаты БДУ, упарадкоўвалi тэрыторыю каля спарткомплексу па вулiцы Кастрычнiцкай i спартыўна-аздараўленчага комплексу «Брыганцiна» i многае iншае. Iнiцыятарамi такiх мерапрыемстваў выступiлі штаб працоўных спраў БРСМ БДУ, студэнцкi саюз i ўпраўленне выхаваўчай работы з моладдзю ўнiверсiтэта. Цырымонiю падвядзення вынiкаў семестра «Лета-2006» адкрыў рэктар БДУ прафесар Васiль Стражаў. Ён павiншаваў усiх студатрадаўцаў i ўручыў граматы i падарункi тым, хто найбольш актыўна праявiлi сябе на працоўных пляцоўках. Сярод запрошаных гасцей былi ветэраны будатрадаўскага руху, прадстаўнiкi Рэспублiканскага штаба студэнцкiх атрадаў Беларускага рэспублiканскага саюза моладзi, гарадскога камiтэта БРСМ i адмiнiстрацыi Маскоўскага раёна Мiнска. Быў названы лепшы будаўнiчы атрад — атрад студэнтаў iнтэрната № 4. Ім быў уручаны Кубак пераможцаў працоўнага руху. Пасля цырымонii ўзнагароджання гасцей чакала невялiкая канцэртная праграма.