Памылiлiся з тарыфамi. Але даплацiць квартплату можна да канца года

Источник материала:

«Гарачы» тэлефон «Звязды» 287-17-41

Паводле слоў бухгалтара КСУП «Ленiнскi» Марыi Прышчык, раней пры налiчэннi кватэрнай платы сям’i заяўнiцы выкарыстоўваўся тарыф у 180 рублёў за квадратны метр. Аднак падчас праверкi з вобласцi рэвiзор указаў, што выкарыстоўваецца не той тарыф, што аўтаматычна пацягнула правядзенне пераразлiку па кватэрнай плаце.

— Усе падлiкi мы правялi з разлiку 225 рублёў за квадратны метр, — патлумачыла Марыя Аляксееўна. — У сям’i Яфiмовiч — чатыры чалавекi, значыць, па гэтаму тарыфу кватэрная плата налiчвалася зыходзячы з 20 квадратных метраў на кожнага члена плюс дадатковыя 10 квадратных метраў на сям’ю. Але агульная плошча жылля — 97 квадратных метраў. Таму звышнарматыўныя 7 метраў павiнны аплачвацца вашымi заяўнiкамi па тарыфу 435 рублёў за квадратны метр. У вынiку i набегла каля 200 тысяч рублёў.

З падлiкамi разабралiся, але чаму працяглы час выкарыстоўвалiся няправiльныя тарыфы? На жаль, гэтае пытанне фактычна засталося без адказу. «Мы тэлефанавалi ў камунгас, бралi лiчбы з газет».

Адзiная прыемная навiна для сям’i Яфiмовiчаў у сiтуацыi, што склалася, дык гэта, як падкрэслiла бухгалтар гаспадаркi Марыя Прышчык, магчымасць унясення даналiчанай кватэрнай платы не адразу, а на працягу года, можна нават часткамi. Нiякая пеня налiчвацца на гэтую суму не будзе.