Iльвы... на вясковай вулiцы

Источник материала:

Кожнаму вяскоўцу, хто ўжо распачаў узвядзенне ўласнай сядзiбы цi яшчэ толькi плануе зрабiць гэта, раiм наведаць спецыялiзаваную выставу «Сельскi дом. Iнтэр’ер», якая адкрылася ў Мiнску ў рамках «Беларускага будаўнiчага тыдня» ў выставачным павiльёне па праспекту Пераможцаў. Каб зверыць уласныя ўяўленнi аб сельскiм будаўнiцтве з сучаснымi дасягненнямi i прапановамi архiтэктараў i вытворцаў будаўнiчых матэрыялаў. Напрыклад, на свае вочы ўбачыць навiнкi ў праектаваннi дамоў, iх унутраным аздабленнi, прыглядзецца i потым выбраць адпаведны ўласнаму густу ландшафтны дызайн, спосабы азелянення i добраўпарадкавання тэрыторыi вакол дома.

Сярод сельскiх забудоўшчыкаў малыя архiтэктурныя формы набываюць усё большую папулярнасць. Кветачнiцы, дэкаратыўныя лавы, вазы, скульптуры (напрыклад, iльвоў i iншых звяроў розных памераў) надаюць вясковым сядзiбам i вулiцам прыгожы выгляд. На выставе даволi шырока прадстаўлены дэкаратыўныя элементы iнтэр’ера жылля, сiстэмы водазабеспячэння i ачысткi сцёкавых вод i каналiзацыi, процiпажарнай аховы, iндывiдуальныя воданапорныя ўстаноўкі, бытавыя прыборы, электратэхнiка i электронiка. Значны выбар сантэхнiчнага абсталявання, газавай апаратуры, ёсць таксама будаўнiчая хiмiя, лакi i фарбы, шпалеры, тканiны, карнiзы... Можна ацанiць i выбраць не толькi абсталяванне, але i адпаведныя iнструменты.