Віцэ-прэзiдэнта НАК Расii ўзнагародзiлi ў Мiнску медалём

Источник материала:

Мiнск наведаў вiцэ-прэзiдэнт Алiмпiйскага камiтэта Расii Генадзь Алёшын. Яго цёзка i калега Генадзь Аляксеенка, першы вiцэ-прэзiдэнт НАК Беларусi, узнагародзiў госця медалём Нацыянальнага алiмпiйскага камiтэта нашай краiны i заўважыў пры гэтым: "Беларускiя i расiйскiя алiмпiйскiя камiтэты пастаянна супрацоўнiчаюць. Спартсмены i трэнеры абедзвюх краiн рэгулярна абменьваюцца вопытам i праводзяць вучэбна-трэнiровачныя зборы на спартыўных базах адна другой".

"Дзякуючы таму, што кiраўнiкi Беларусi i Расii самi з’яўляюцца вялiкiмi аматарамi спорту, — падкрэслiў Генадзь Алёшын, — у абедзвюх дзяржавах надаецца вялiкае значэнне ўмацаванню матэрыяльна-тэхнiчнай базы спартыўнай галiны i заахвочванню насельнiцтва да здаровага ладу жыцця".

Дарэчы, Генадзь Алёшын таксама з’яўляецца вiцэ-прэзiдэнтам Еўрапейскай лiгi плавання. Дзякуючы яго падтрымцы, нашай краiне дазволiлi прыняць ганаровы турнiр — чэмпiянат Еўропы па скачках у ваду сярод юнiёраў. "Беларусы заўжды вызначалiся сваёй гасцiннасцю, уменнем прыняць любы турнiр, — падкрэслiў госць. — На Алiмпiядзе-2008 у Пекiне не варта перабольшваць магчымасцi кiтайскiх спартсменаў, а тым больш пужацца iх. Беларусам i расiянам неабходна проста выступаць на высокiм узроўнi i пастарацца ўзяць свае медалi ў каронных дысцыплiнах".

Першы вiцэ-прэзiдэнт НАК Беларусi дадаў, што на мiнулай летняй Алiмпiядзе беларусы маглi заваяваць большую колькасць узнагарод, бо 10 спартсменаў спынiлiся за крок ад п’едэстала, заняўшы 4-е месца. Улiчваючы гэта, пры падрыхтоўцы да сёлетняга старту вялiкую ўвагу надалi маральна-валявым i псiхалагiчным аспектам.