Курсантам ваенных ВНУ Беларусі будзе прадастаўляцца матэрыяльная дапамога на праезд

Источник материала:

Палажэнне аб парадку прадастаўлення матэрыяльнай дапамогi на праезд курсантам дзённай формы навучання ваенных навучальных устаноў, устаноў адукацыi Мiнiстэрства ўнутраных спраў i Мiнiстэрства па надзвычайных сiтуацыях зацвердзiў Савет Мiнiстраў Беларусi.

У адпаведнасцi з дакументам курсантам, сярэднедушавы даход сям’i якiх па аб’ектыўных прычынах не перасягае 100 працэнтаў найбольшай велiчынi бюджэту пражытковага мiнiмуму ў сярэднiм на душу насельнiцтва, зацверджанага ўрадам Беларусi, за два апошнiя кварталы, прадастаўляецца матэрыяльная дапамога на праезд.

Курсантам навучальных устаноў прадастаўляецца кампенсацыя 50 працэнтаў кошту праезду (праязнога дакумента) да месца пражывання сям’i (бацькоў): не больш як за дзве паездкi (туды i назад) у месяц на пасажырскiм транспарце агульнага карыстання рэгулярных мiжгароднiх зносiнаў; не больш як за чатыры паездкi (туды i назад) у месяц на пасажырскiм транспарце агульнага карыстання рэгулярных прыгарадных зносiнаў. Па жаданні курсанта яна можа быць заменена матэрыяльнай дапамогай на праезд па месячным праязным бiлеце на адзiн з вiдаў гарадскога пасажырскага транспарту ад месца пражывання курсанта да навучальнай установы.

Матэрыяльная дапамога на праезд курсантам навучальных устаноў прадастаўляецца ў суботу i нядзелю, святочныя днi, устаноўленыя i аб’яўленыя нерабочымi, а таксама ва ўсе днi тыдня пры адбыццi ў водпуск, але не раней чым з дня падачы рапарта з усiмi неабходнымi дакументамi.

Рашэнне аб аказаннi матэрыяльнай дапамогi канкрэтнаму курсанту i яе памеры прымаецца пастаянна дзеючай камiсiяй па прадастаўленні матэрыяльнай дапамогi на праезд, што ствараецца ў навучальнай установе, на працягу 5 рабочых дзён з дня падачы рапарта з усiмi неабходнымi дакументамi. Камiсiю ўзначальвае начальнiк навучальнай установы (ваеннага факультэта цывiльнай установы адукацыi).

Сярэднедушавы даход сям’i курсанта вылiчваецца за тры месяцы, якiя папярэднiчаюць месяцу звароту па прадастаўленне матэрыяльнай дапамогi на праезд. Сярэднедушавы даход сям’i вызначаецца шляхам дзялення сукупнага даходу ўсiх членаў сям’i за разлiковы перыяд на колькасць месяцаў у гэтым перыядзе i на колькасць членаў сям’i, улiчаных у яе складзе.

Выплата матэрыяльнай дапамогi на праезд ажыццяўляецца ў парадку i тэрмiны, устаноўленыя ў навучальнай установе для выплаты грашовага забеспячэння.

БЕЛТА.