Юнацтва — чэмпіён

Источник материала:

Мiнскае "Юнацтва" стала пераможцам фiнальнай серыi Адкрытага чэмпiянату Беларусi па хакеi, абгуляўшы "Гомель" з агульным лiкам 4:3. У вырашальным матчы, якi прайшоў 3 красавiка ў сталiчным Палацы спорту, каманда Мiхаiла Захарава ўзяла верх над супернiкам з вынiкам 1:0. Пасля перамогi 3:2 23 сакавiка ў Мiнску "Юнацтва" павяло ў серыi — 1:0. Затым тройчы перамог "Гомель" — 2:0 (24 сакавiка ў Мiнску), 3:2 у авертайме (27 сакавiка ў Гомелi) i 4:0 (28 сакавiка ў Гомелi). Наступныя два паядынкi засталiся за "Юнацтвам" — 3:1 (30 сакавiка ў Мiнску) i 3:2 (1 красавiка ў Гомелi). У рэгулярным чэмпiянаце "Юнацтва" заняло першае месца, "Гомель" — другое. У чатырох вочных сустрэчах гамяльчане атрымалi тры перамогi.

"Нават прайграючы "Гомелю" ў серыi 1:3, не сумняваўся, што выйграем", — заявiў галоўны трэнер "Юнацтва" Мiхаiл Захараў пасля заканчэння вырашальнага фiнальнага матча. "Настолькi цяжкай гэта серыя была для мяне ўпершыню. Адбiўся дух "Юнацтва". Мы вельмi сур’ёзна настройвалiся. Я старшынi федэрацыi казаў, што дарэмна ён з кубкам едзе ў Гомель. Лёс медалёў вырашыцца ў Мiнску. Прысвячаю перамогу ўсiм мiнскiм балельшчыкам. Нас, магчыма, не любяць, аднак мы на слыху. І мне гэтага дастаткова", — заявiў Мiхаiл Захараў.

"Каментаваць няма чаго, — заявiў галоўны трэнер "Гомеля" Аляксандр Андрыеўскi. — Я засмучаны. "Юнацтва" не даруе памылак. На папярэднiх стадыях серыi цягнулiся да трох перамог. Фiнал цягнуўся да чатырох, i гэту чацвёртую перамогу мы, на жаль, не дабылi".

Гандбалiсты мiнскага "Дынама" сталi пераможцамi Балтыйскай лiгi. У вырашальным матчы фiнальнай стадыi ў Рызе падапечныя Аляксандра Малiноўскага ўпэўнена перайгралi талiнскi клуб "Чокэлiт Бойз" — 30:22. Для дынамаўцаў гэта першы тытул за нядоўгую гiсторыю каманды, створанай у 2008 годзе. Бронзавымi прызёрамi сёлетняй Балтыйскай лiгi сталi спартсмены Брэсцкага гандбольнага клуба iмя Мяшкова. У матчы за трэцяе месца брастаўчане перамаглi гандбалiстаў рыжскага СКА з мiнiмальнай перавагай — 30:29.

Матчамi першага тура стартаваў XIX чэмпiянат краiны па футболе сярод камандаў вышэйшай лiгi. У суботу i нядзелю матчы прайшлi ў сямi гарадах Беларусi. Аднак i першы, i другi дзень не парадавалi балельшчыкаў вялiкай колькасцю забiтых мячоў. Вось вынiкi матчаў: "Вiцебск" — "Тарпеда" (Жодзiна) — 0:1; "Шахцёр" (Салiгорск) — "Нафтан" (Наваполацк) — 1:1; "Нёман" (Гродна) — "Гомель" — 1:0; "Гранiт" (Мiкашэвiчы) — МТЗ-РIПА (Мiнск) — 1:2; "Смаргонь" — "Дынама" (Брэст") — 0:1; БАТЭ (Барысаў) — "Днепр" (Магiлёў) — 1:0; "Дынама" (Мiнск) — "Мiнск" — 2:1.