Дзіця за мяжу без дазволу бацькі пусцяць не раней за наступны год

Источник материала:

19 мая 2009 Общество
Павал Гіба, Еўрапейскае радыё для Беларусі Нават калі парламент паспее прыняць адпаведны закон да пачатку лета

Чаго не зробіш дзеля таго, каб дзіця магло з'ездзіць за мяжу: шмат жанчын пазбаўляюць з-за гэтага былых мужоў бацькоўскіх правоў, ці звяртаюцца ў суд, каб той пастанавіў, што высвятліць месцазнаходжанне нядбайнага мужа немагчыма.

Але гэтых усіх працэдур можна будзе пазбегнуць, калі Палата прадстаўнікоў прыме ў другім чытанні закон "Аб парадку выезду з Рэспублікі Беларусь і ўезду ў Рэспубліку Беларусь грамадзян Рэспублікі Беларусь".

Пра тое, што закон ужо прыняты, але пакуль што ў першым чытанні, Еўрарадыё распавялі ў Камісіі па правах чалавека пры Палаце прадстаўнікоў, якая займалася падрыхтоўкай праекта:

"Закон прыняты ў першым чытанні 2 красавіка 2009 году. Зараз вядзецца падрыхтоўка да другога чытання".

Праўда, спадзявацца на тое, што ўжо ў гэтым годзе дазвол абодвух бацькоў стане непатрэбным, не варта. Як кажуць у Камісіі, закон калі і ўступіць у сілу, то толькі праз 6 месяцаў пасля публікацыі. То бок, гэта здарыцца не раней за наступны год.

Камісія па правах чалавека пры Палаце прадстаўнікоў: "На гэтай сесіі плануецца ў другі раз разгледзець праект закона. Пакуль невядома дакладная дата. Але закон увойдзе ў сілу толькі праз 6 месяцаў пасля афіцыйнай публікацыі яго ў прэсе".

Ідэю аб спрашчэнні выезду дзяцей за мяжу прапанавалі самі памежнікі. Начальнік прэс-службы Памежнага камітэту Аляксандр Цішчанка адзначае, што памежныя службы вельмі часта сутыкаюцца з сітуацыямі, калі адзін з бацькоў не згодны на тое, каб яго дзіця падарожнічала.

Аляксандр Цішчанка: "З пытаннямі, якія звязаныя з перасячэннем мяжы дзецьмі і тымі, хто іх суправаджае, даводзіцца сутыкацца нам (памежнікам — ЕРБ). Гэтае змякчэнне пытанняў — калі дзіця едзе ў суправаджэнні аднаго з бацькоў і дазвол другога не абавязковы — гэта нармальна, на наш погляд. Таму такія змены былі ўнесеныя ў новы законапраект".

Зараз, каб паехаць з дзіцём за мяжу, неабходны дазвол абодвух бацькоў. Гэта не простая працэдура: трэба ісці ў ЖЭС ці ў натарыяльную кантору, пісаць заяву. Часта адзін з бацькоў не дае дазволу толькі таму, што жадае "насаліць" былой жонцы ці мужу, кажа Цішчанка.

"Жыццё — такая штука, яно падказвае, што з атрыманнем ўсіх гэтых дазволаў у людзей узнікаюць вялікія праблемы. Не заўсёды былыя муж з жонкай ў добрых стасунках. Бывае, што нехта з бацькоў супраць не з-за таго, што баіцца за дзіця, а з-за таго, каб "насаліць" адзін адному. І людзі вымушаныя высвятляць адносіны, размаўляць адзін з адным. А ад гэтага пакутуюць дзеці. А што тут дрэннага, калі дзіця з'ездзіць адпачыць на мора з мамай ці папай?".

Аляксандр Цішчанка спадзяецца, што да восені закон пройдзе ўсе працэдуры. Але гэтае лета дакладна пройдзе ў мінулых умовах.