Пошукам і ратаваннем пасажыраў і экіпажаў паветраных суднаў у Беларусі будзе займацца "Авіяцыя" МНС

Источник материала:

Адпаведны ўказ № 18 "Аб пошуку і ратаванні пасажыраў і экіпажаў паветраных суднаў, якія церпяць або пацярпелі бедства на тэрыторыі Рэспублікі Беларусь" Прэзідэнт Беларусі падпісаў 6 студзеня, паведамілі БЕЛТА ў прэс-службе кіраўніка дзяржавы.

Дакументам у адпаведнасці з артыкулам 91 Паветранага кодэкса Беларусі на дзяржаўную авіяцыйна-выратавальную ўстанову "Авіяцыя" Міністэрства па надзвычайных сітуацыях ускладаецца каардынацыя, арганізацыя і правядзенне мерапрыемстваў па пошуку і ратаванні пасажыраў і экіпажаў паветраных суднаў, якія церпяць або пацярпелі бедства на тэрыторыі Беларусі.

Гэта ўстанова павінна будзе забяспечваць кругласутачную гатоўнасць ратавальнікаў і авіяцыйнай тэхнікі да вылету для правядзення пошукавых і аварыйна-выратавальных работ у любой частцы краіны.

У мерапрыемствах па пошуку і ратаванні пасажыраў і экіпажаў паветраных суднаў будуць прымаць удзел органы і падраздзяленні па надзвычайных сітуацыях, размешчаныя на адпаведнай тэрыторыі, а таксама пры неабходнасці прыцягвацца сілы і сродкі іншых рэспубліканскіх органаў дзяржаўнага кіравання і іншых арганізацый. Пералік і парадак прыцягнення такіх сіл і сродкаў даручана вызначыць ураду.