Міма інфаркту і інсульту...
17.04.2012
—
Новости Общества
|
У межах агульнарэспубліканскай акцыі "Беражы здароўе змоладу. Прайдзі міма інфаркту і інсульту", якая адбудзецца 19 і 20 красавіка, урачы-кардыёлагі плануюць ацаніць распаўсюджанасць фактараў рызыкі ў пацыентаў, якія звяртаюцца ў лячэбныя ўстановы. Асобная ўвага будзе ўдзяляцца навучанню вымярэнню артэрыяльнага ціску, выяўленню такіх паталогій, як артэрыяльная гіпертэнзія, сардэчная недастатковасць і парушэнне сардэчнага рытму. Піць таблеткі — мала Першае, што патрабуецца ад хворага на артэрыяльную гіпертэнзію — строга вытрымліваць рэкамендацыі ўрача і ні ў якім разе самавольна не спыняць лячэнне! "Прагноз лячэння гіпертаніі можа палепшыцца толькі ў выпадку неперарыўнасці лячэння, — падкрэслівае вядучы навуковы супрацоўнік лабараторыі артэрыяльнай гіпертэнзіі РНПЦ "Кардыялогія" Вольга ПАЎЛАВА. — Акрамя таго, пацыентам, якія памылкова мяркуюць, што прыём 1-2 таблетак з'яўляецца дастатковым для добрага прагнозу, можна сказаць наступнае: калі вы ігнаруеце немедыкаментозныя метады лячэння, значыць, вам неабходна прымаць значна больш лекавых прэпаратаў. А чым больш таблетак, тым, зразумела, больш пабочных рэакцый". Гіпертоніку трэба мець на ўвазе: üКожны лішні кілаграм павышае ціск на 1-3 мм рт. сл. üФізічная актыўнасць — 30-40 хвілін 3-4 разы на тыдзень — спрыяе павышэнню адаптацыйных магчымасцяў арганізма, мышачнай сіле і вынослівасці. üЗмяншэнне паваранай солі — да 5 гр. за суткі — зніжае ціск на 4-6 мм рт. сл. üУжыванне алкаголю з'яўляецца моцным правакатарам развіцця гіпертанічных крызаў і сардэчна-сасудзістых ускладненняў. üНе рэкамендуецца адначасовае ўжыванне гіпатэнзіўных сродкаў і алкаголю. üЗніжэнне ўзроўню артэрыяльнага ціску і халестэрыну ў крыві ўсяго на 10 працэнтаў спрыяе зніжэнню агульнай рызыкі сардэчна-сасудзістых ускладненняў на 45 працэнтаў. üКантроль артэрыяльнага ціску на прыёме ва ўрача і ў хатніх умовах — залатое правіла. Збілася з рытму 70 працэнтаў хворых з сардэчнай недастатковасцю, якая ўносіць важкі ўклад у структуру смяротнасці і інвалідызацыі працаздольнага насельніцтва, нават не падазраюць аб наяўнасці ў іх такой праблемы. Сэрца забяспечвае наш арганізм кроўю, з якой ва ўсе органы і тканкі паступаюць жыццёва неабходныя кісларод і карысныя рэчывы. Калі сэрца не выконвае сваю функцыю належным чынам, усе органы і тканкі пакутуюць. У першую чаргу пачынаюцца праблемы з печанню, лёгкімі і ныркамі, што абумоўлівае заўчасную гібель пацыента ад хранічнай поліарганнай недастатковасці. Задышка, хуткая стамляльнасць, сэрцабіццё і кашаль павінны не проста насцярожыць, а "накіраваць" да ўчастковага ўрача. "Хранічную сардэчную недастатковасць могуць выклікаць спадчынныя і набытыя пашкоджанні клапанаў сэрца, міякарда (у тым ліку віруснае), каранарных сасудаў, — кажа ўрач-кардыёлаг 3-га кардыялагічнага аддзялення РНПЦ "Кардыялогія" Ірына ГРЭБІНЮК. — Акрамя таго, сэрца можа пакутаваць і ў пацыентаў з высокай масай цела, высокім узроўнем халестэрыну, з цукровым дыябетам, хранічнай абструктыўнай хваробай лёгкіх, захворваннямі шчытападобнай залозы, а таксама ў выніку злоўжывання таксічнымі рэчывамі — алкаголем і наркотыкамі". Для лячэння пацыентаў з сардэчнай недастатковасцю выкарыстоўваецца тры групы прэпаратаў. Прычым толькі штодзённая, бесперапынная тэрапія дапамагае пазбавіцца такіх непрыемных сімптомаў як ацёчнасць у канечнасцях, застой вадкасці ў лёгкіх і паляпшае доўгатэрміновы прагноз, прыпыняе прагрэсаванне захворвання. У крайніх выпадках прымяняюцца і хірургічныя метады лячэння, у тым ліку трансплантацыя. Са стымулятарам унутры Страта прытомнасці па прычыне парушэння сардэчнага рытму можа стаць паказаннем да такога ўмяшання, як радыёчастотная аблацыя, якая прымяняецца як у РНПЦ "Кардыялогія", так і ў некаторых абласных цэнтрах і гарадскіх бальніцах. Аднаразовая маніпуляцыя пазбаўляе пацыента парушэння рытму сэрца. "Пазітыўнай тэндэнцыяй у справе лячэння памянёнай паталогіі становіцца стабільны рост колькасці імплантацый кардыё- стымулятараў тым, хто мае парушэнні рытму сэрца, звязаныя з рэдкім сэрцабіццём, паўзамі, абумоўленымі сіндромам слабасці сінусавага вузла, — удакладняе вядучы навуковы супрацоўнік лабараторыі парушэння сардэчнага рытму РНПЦ "Кардыялогія" Дзмітрый ГАНЧАРЫК. — За апошнія тры гады колькасць імплантацый вырасла на 15-20 працэнтаў. Такіх пацыентаў неабходна выяўляць як мага раней, каб яны не траплялі ў сітуацыі страты прытомнасці і атрымання сур'ёзных траўмаў". Актыўна развіваецца сёння і імплантацыя кардыястымулятара-дэфібрылятара, з функцыяй, так бы мовіць, электрашокера — для тых выпадкаў, калі сэрца раптоўна пачынае біцца вельмі хутка, звыш 200 удараў у хвіліну, што адэкватна спыненню кровазвароту. У такога пацыента моцна падае ціск і ўзнікае пагроза жыццю. Летась спецыялісты імплантавалі 130 такіх кардыястымулятараў-камп'ютараў. Часцей пачалі ўстанаўлівацца і больш рэдкія, спецыялізаваныя кардыястымулятары, здольныя палепшыць помпавую функцыю сэрца, вялікія памеры якога не дазваляюць сінхронна працаваць розным камерам. Трэба пастарацца Агульная смяротнасць ад хвароб сістэмы кровазвароту знізілася ў 2011 годзе на 3 працэнты ў параўнанні з годам 2010-м. Аднак смяротнасць сярод працаздольнага насельніцтва летась вырасла на 3 працэнты ў параўнанні з 2010-м. Прычыну такога становішча спецыялісты бачаць у адсутнасці матывацыі да захавання здароўя. Дастаткова сказаць, што палова загінулых у выніку хвароб сістэмы кровазвароту злоўжывалі алкаголем. Клапаціцца аб здароўі сардэчна-сасудзістай сістэмы — гэта значыць: 1. Не курыць (адсутнасць пасіўнага курэння). 2. Не злоўжываць алкаголем. 3. Мець узровень халестэрыну менш за 5 ммоль/л (для здаровых людзей). 4. Мець узровень ліпапратэідаў нізкай шчыльнасці менш за 3 ммоль/л. 5. Забяспечыць сабе ўмераную фізічную актыўнасць. 6. Ужываць не менш за 5-6 штук садавіны і гародніны штодня. 7. Кантраляваць масу цела. 8. Кантраляваць узровень глюкозы ў крыві. 9. Лячыць цукровы дыябет. Святлана БАРЫСЕНКА Чтобы разместить новость на сайте или в блоге скопируйте код:
На вашем ресурсе это будет выглядеть так
У межах агульнарэспубліканскай акцыі "Беражы здароўе змоладу. Прайдзі міма інфаркту і інсульту", якая адбудзецца 19 і 20 красавіка, урачы-кардыёлагі плануюць...
|
|