Чаму я чытаю «Р»?

— Я шмат гадоў адпрацавала галоўным бухгалтарам у розных арганізацыях, у тым ліку прыватнай формы ўласнасці. І ўвесь час газета «Рэспубліка» была маім добрым спадарожнікам і кансультантам.

Там заўсёды аператыўна публікуецца нарматыўная база, дакументы з’яўляюцца ў друку літаральна адразу, як толькі падпісваюцца ўрадам, міністэрствамі і ведамствамі. Выданне незаменнае для тых, хто працуе эканамістам і бухгалтарам, таму яно абавязкова павінна знаходзіцца на рабочым стале. Але важная не толькі нарматыўна-прававая база, але і своечасовыя прафесійныя каментарыі, а таксама вопыт людзей, якія сур’ёзна і эфектыўна займаюцца эканомікай, бізнесам. Хоць жыццё наша зараз і поўніцца сучаснымі тэхналогіямі сувязі, але ў гэтай віхуры з-за занятасці калегі не так часта сустракаюцца. А газета дазваляе заўсёды ведаць, як працуюць людзі адной або блізкіх галін у розных раёнах, а тым больш абласцях: цікава, як развіваюцца калегі, што змаглі зрабіць на сваіх прадпрыемствах і ў арганізацыях. Такім чынам, газета «Рэспубліка» аб’ядноўвае людзей, праз яе своеасаблівую сувязь трымаюць знаёмыя і незнаёмыя людзі. А гэта цудоўна!

Карысная яна не толькі для тых, хто працуе. Вось, мяркую па сабе: ужо на заслужаным адпачынку, але ўсё роўна з задавальненнем чытаю. Цікаўлюся дакументамі, параўноўваю з ранейшымі — вядома ж, калі чалавек шмат адпрацаваў у нейкай сферы дзейнасці, то былых прафесіяналаў не бывае! Пералічваць тое, што падабаецца, не буду, бо яго шмат. Адзначу толькі падкрэсленую інтэлігентнасць гэтай газеты ва ўсім — ад сур’ёзных артыкулаў да дасціпнага гумару.