Мост зрабiць лёгка?

Источник материала:

ЁСЦЬ ПЫТАННЕ

Новы мост стаў значнай, доўгачаканай падзеяй у жыццi вяскоўцаў. Ён можа вытрымаць нават цяжкiя грузавiкi. Да таго ж, цяпер не трэба пераадольваць 15 кiламетраў, каб дабрацца ў райцэнтр, цэнтральную сядзiбу... Пастаралiся ваенныя будаўнiкi — спецыялiсты ў гэтай вобласцi, каб i сваё прафесiйнае майстэрства падшлiфаваць, i зрабiць добры падарунак людзям.

А вось жыхары былога райцэнтра Сураж, што ў Вiцебскiм раёне, толькi мараць аб пастаянным мосце. Тут i дагэтуль праз раку ходзiць паром. Ёсць i катэр, якi вяскоўцы называюць «Тытанiк». Ходзiць гэты водны транспарт спраўна, як кажуць, лепш, чым у Вiцебску так званыя «маршруткi»: строга па графiку, некалькi разоў у дзень. Але ж позняй восенню, зiмой, вясной, калi холадна i «цяжкi» лёд з’яўляецца на вадзе, узнiкаюць сур’ёзныя праблемы з перапраўкай на другi бераг Заходняй Дзвiны.

Быў час (пару гадоў таму), калi паром зламаўся, i трэба было, каб дабрацца ў школу i iншыя «ачагi» цывiлiзацыi, гадзiнамi ехаць «па кругу», каб пераадолець дзесяткi кiламетраў. Нават школьныя заняткi ў некаторых юных суражцаў тады раптам спынiлiся.

Вяскоўцы добра памятаюць, што яшчэ ў савецкiя гады планавалася збудаванне ў Суражы моста. Але ж дарагавiзна праекта i «неперспектыўнасць» пасёлка не дазволiлi ажыццявiць мару.

У чаканнi выбараў у мясцовыя Саветы суражцы спадзяюцца, што дэпутаты розных узроўняў усё ж дапамогуць у вырашэннi актуальнай для пасёлка праблемы. Тым больш што недалёка ад Суража знаходзiцца мяжа з Расiяй. I хай у гэтым накiрунку рух аўтамабiляў адносна невялiкi, але ж нашы саюзныя краiны развiваюцца хуткiмi тэмпамi. Шмат магчымасцяў у суражан па развiццю турыстычнай iнфраструктуры, ёсць канкрэтныя планы. Ды i дзесяткi сем’яў расiян пацвердзiлi свой iнтарэс да Суража: купiлi тут дамы пад пастаяннае жыллё i дачы. I жывуць у брацкай краiне, чакаючы, як i нашы землякi, прыемных змен.