Дэкрэт Прэзідэнта Рэспублiкi Беларусь № 15 Аб асобных пытаннях агульнай сярэдняй адукацыi

Источник материала:

У мэтах забеспячэння для ўсiх грамадзян роўных магчымасцяў атрымання агульнай сярэдняй адукацыi, якая адпавядае сучасным умовам сацыяльна-эканамiчнага развiцця Рэспублiкi Беларусь, i ў адпаведнасцi з часткай трэцяй артыкула 101 Канстытуцыi Рэспублiкi Беларусь:

1. Устанавiць, што:

1.1. тэрмiн атрымання:

агульнай базавай адукацыi складае 9 гадоў (для асобаў з асаблiвасцямi псiхафiзiчнага развiцця — 9—10 гадоў);

агульнай сярэдняй адукацыi — 11 гадоў (для асобаў з асаблiвасцямi псiхафiзiчнага развiцця — 11—12 гадоў);

агульнай сярэдняй адукацыi ў вячэрнiх школах, класах, вучэбна-кансультацыйных пунктах, у якiх навучанне ажыццяўляецца па тыпавым вучэбным плане вячэрняй школы, — 12 гадоў (для асобаў з асаблiвасцямi псiхафiзiчнага развiцця — 12-13 гадоў);

1.2. тэрмiны навучання на ступенях агульнай сярэдняй адукацыi складаюць:

на І ступенi — 4 гады (для асобаў з асаблiвасцямi псiхафiзiчнага развiцця — 4—5 гадоў);

на II ступенi — 5 гадоў;

на III ступенi — 2 гады, у вячэрнiх школах, класах, вучэбна-кансультацыйных пунктах, у якiх навучанне ажыццяўляецца па тыпавым вучэбным плане вячэрняй школы, — 3 гады;

1.3. вучэбныя заняткi ў навучальным годзе ажыццяўляюцца з 1 верасня па 1 чэрвеня. Калi названыя даты прыпадаюць на нерабочы дзень, то вучэбныя заняткi ў навучальным годзе пачынаюцца ў наступны i завяршаюцца ў папярэднi рабочы дзень;

1.4. адукацыйны працэс пры навучаннi на I, II i III ступенях агульнай сярэдняй адукацыi арганiзуецца ў рэжыме шасцiдзённага школьнага тыдня, якi ўключае пяцiдзённы вучэбны тыдзень i адзiн дзень для правядзення з навучэнцамi спартыўна-масавых, фiзкультурна-аздараўленчых, iншых выхаваўчых мерапрыемстваў, арганiзацыi працоўнага навучання, у тым лiку вучэбных заняткаў на вучэбна-вытворчых аб’ектах.

У IХ(Х)-ХI(ХII) класах у шосты школьны дзень могуць праводзiцца факультатыўныя заняткi;

1.5. вывучэнне вучэбных прадметаў у агульнаадукацыйных установах ажыццяўляецца на базавым узроўнi.

Навучэнцы з улiкам меркавання iх бацькоў або iншых законных прадстаўнiкоў зыходзячы са схiльнасцяў, жаданняў i стану здароўя могуць вывучаць асобныя вучэбныя прадметы на павышаным узроўнi на факультатыўных занятках у межах устаноўленай тыпавым вучэбным планам колькасцi вучэбных гадзiн.

У агульнаадукацыйных установах могуць праводзiцца факультатыўныя заняткi прыродазнаўча-матэматычнай, гуманiтарнай, грамадазнаўчай, экалагiчнай, ваенна-патрыятычнай, музычнай, харэаграфiчнай, мастацкай, тэатральнай, спартыўнай i iншай накiраванасцi.

Факультатыўныя заняткi, як правiла, праводзяцца да пачатку або пасля завяршэння ўрокаў.

На I, II i III ступенях агульнай сярэдняй адукацыi могуць стварацца спецыялiзаваныя па спорце класы.

На III ступенi агульнай сярэдняй адукацыi можа ажыццяўляцца прафесiйная падрыхтоўка навучэнцаў;

1.6. у гiмназiях i лiцэях асобныя вучэбныя прадметы вывучаюцца на павышаным узроўнi. Парадак арганiзацыi i дзейнасцi гiмназiй i лiцэяў вызначаецца Мiнiстэрствам адукацыi з улiкам патрабаванняў гэтага Дэкрэта i iншых заканадаўчых актаў.

2. Тэрмiн навучання на III ступенi агульнай сярэдняй адукацыi складае адзiн год:

у 2008/2009 навучальным годзе для навучэнцаў, якiя атрымалi агульную базавую адукацыю ў 2007/2008 навучальным годзе;

у 2009/2010 навучальным годзе для навучэнцаў, якiя ў 2007/2008 навучальным годзе вучылiся ў IХ класе.

Для навучэнцаў, названых у гэтым пункце, вучэбныя заняткi могуць быць арганiзаваны ў рэжыме шасцiдзённага вучэбнага тыдня.

3. Да прывядзення ў адпаведнасць з гэтым Дэкрэтам акты заканадаўства прымяняюцца ў частцы, якая не супярэчыць гэтаму Дэкрэту.

4. Савету Мiнiстраў Рэспублiкi Беларусь:

4.1. з 1 студзеня 2009 г.:

павысiць тарыфныя аклады (стаўкi) педагагiчным работнiкам агульнаадукацыйных устаноў, спецыяльных устаноў адукацыi (акрамя спецыяльных дашкольных устаноў), устаноў, якiя забяспечваюць атрыманне прафесiйна-тэхнiчнай i сярэдняй спецыяльнай адукацыi, што фiнансуюцца з бюджэту;

устанавiць:

штомесячныя даплаты маладым спецыялiстам з вышэйшай i сярэдняй спецыяльнай адукацыяй з лiку педагагiчных работнiкаў агульнаадукацыйных устаноў, спецыяльных устаноў адукацыi (акрамя спецыяльных дашкольных устаноў), устаноў, якiя забяспечваюць атрыманне прафесiйна-тэхнiчнай i сярэдняй спецыяльнай адукацыi, што фiнансуюцца з бюджэту, у памеры адной тарыфнай стаўкi першага разраду, устаноўленай Саветам Мiнiстраў Рэспублiкi Беларусь для аплаты працы работнiкаў дзяржаўных арганiзацый, якiя фiнансуюцца з бюджэту i карыстаюцца дзяржаўнымi датацыямi;

надбаўкi за наяўнасць квалiфiкацыйнай катэгорыi педагагiчнага работнiка кiраўнiкам агульнаадукацыйных устаноў, спецыяльных устаноў адукацыi (акрамя спецыяльных дашкольных устаноў), устаноў, якiя забяспечваюць атрыманне прафесiйна-тэхнiчнай i сярэдняй спецыяльнай адукацыi, што фiнансуюцца з бюджэту, iх намеснiкам па асноўнай дзейнасцi;

4.2. сумесна з аблвыканкамамi i Мiнскiм гарвыканкамам фiнансаваць расходы, звязаныя з названым павышэннем заработнай платы педагагiчных работнiкаў, у межах сродкаў, прадугледжаных на адукацыю ў рэспублiканскiм i мясцовых бюджэтах;

4.3. да 1 студзеня 2009 г. забяспечыць прывядзенне актаў заканадаўства ў адпаведнасць з гэтым Дэкрэтам;

4.4. да 1 студзеня 2010 г. дапрацаваць i ўнесцi ў Палату прадстаўнiкоў Нацыянальнага сходу Рэспублiкi Беларусь праект Кодэкса Рэспублiкi Беларусь аб адукацыi з улiкам палажэнняў гэтага Дэкрэта i практыкi яго прымянення;

4.5. прыняць iншыя меры па рэалiзацыi гэтага Дэкрэта.

5. Мiнiстэрству адукацыi:

5.1. пачынаючы з 2008/2009 навучальнага года забяспечыць пераход агульнаадукацыйных устаноў на тэрмiны атрымання агульнай базавай i агульнай сярэдняй адукацыi, прадугледжаныя ў падпунктах 1.1 i 1.2 пункта 1 гэтага Дэкрэта, i да 1 верасня 2008 г. зацвердзiць адпаведныя вучэбныя планы;

5.2. сумесна з Нацыянальнай акадэмiяй навук Беларусi, Вышэйшай атэстацыйнай камiсiяй стварыць камiсiю па экспертызе i дапрацоўцы вучэбных праграм для агульнаадукацыйных устаноў.

6. Гэты Дэкрэт уступае ў сiлу з дня яго афiцыйнага апублiкавання, за выключэннем пункта 1, якi ўступае ў сiлу з 1 верасня 2008 г., з’яўляецца часовым i ў адпаведнасцi з часткай трэцяй артыкула 101 Канстытуцыi Рэспублiкi Беларусь прадстаўляецца на разгляд Нацыянальнага сходу Рэспублiкi Беларусь.