Цеплавозам — праз балота

Источник материала:

Кожную ранiцу праз балота ў Жабiнкаўскiм раёне праходзiць прывычны для гэтых мясцiн цягнiк — цеплавоз з некалькiмi вагончыкамi. Гэта стратэгiчны транспартны сродак мясцовага торфапрадпрыемства "Гатча-Осаўскае".

Машынiст цеплавоза Аляксандр Штык сваю машыну ведае нiбы свае пяць пальцаў. Паводле яго слоў, штодзённы маршрут не надакучвае, бо прырода навокал маляўнiчая. Каляя пракладзеная па былых залежах торфу, якiя ўжо распрацаваны. Участкi пакрылiся вадой i ператварылiся ў неглыбокiя балоцiстыя азёры. Тут шмат рыбы. Сюды вярнулiся балотныя птушкi-"чырванакнiжнiцы". Толькi любуйся прыроднай iдылiяй за акном: вось застыла чапля над вадой ў чаканнi рыбкi, а крыху далей праплывае са сваiм вывадкам паважная лебедзь.

І такой цiшынёй, некранутасцю, няспешнасцю патыхае ад краявiдаў, што мiжволi вырвалася прапанова-пытанне: а цi нельга на цеплавозе турыстаў вазiць? I аказалася, такi прэцэдэнт быў. Экскурсiю для госця з далёкага замежжа аднойчы наладзiлi, праўда, некамерцыйную. Але чалавек быў у захапленнi. Так што можна падумаць i аб платных паслугах такога кшталту. Толькi папярэдне давядзецца рыбакоў паганяць. Многiя аблюбавалi i гэтыя непраходныя, далёкiя ад дарог мясцiны. Рыбы тут багата, i месца для адпачынку цудоўнае. Але ж... Ну не ўмее наш чалавек пабыць на прыродзе i не пакiнуць ёй "у знак удзячнасцi" гурбу смецця. I невядома калi навучыцца.