Мыта на аўто пакуль без змен

Источник материала:

На працягу 2009 года ўвесь беларускi экспарт будзе пераведзены на сiстэму электроннага дэкларавання. Аб гэтым падчас сустрэчы з журналiстамi паведамiў старшыня Дзяржаўнага мытнага камiтэта Аляксандр Шпiлеўскi.

Яшчэ адным спрыяльным фактарам для развiцця знешнеэканамiчнай дзейнасцi стане фармiраванне мытнага саюза Беларусi, Расii i Казахстана. Ён павiнен з’явiцца ў 2010 годзе. Прычым тады ж Беларусь i Расiя пяройдуць на мытнае афармленне на адзiнай мяжы дзвюх дзяржаў. У сувязi з гэтым, зазначыў Аляксандр Шпiлеўскi, афармленне транспартных сродкаў на беларуска-расiйскай мяжы стане неактуальным.

Таксама да 2010 года Беларусь, Расiя i Казахстан павiнны перайсцi на адзiныя мытныя тарыфы. На сёння яны ўзгодненыя на 95 працэнтаў. У лiку няўзгодненых тавараў — легкавыя аўтамабiлi. Пакуль тут бакi абараняюць свае iнтарэсы. Аднак, паведамiў Аляксандр Шпiлеўскi, цяпер пытанне змянення мытных тарыфаў на легкавыя аўтамабiлi не стаiць.

Тым часам, паведамiлi ў ДМК, летась мытнiкi пералiчылi ў бюджэт дзяржавы амаль 15,5 трлн рублёў. Пры гэтым у 2008 годзе было выяўлена 15 706 парушэнняў мытнага заканадаўства, узбуджана 59 крымiнальных спраў. У прыватнасцi, удалося спынiць 62 спробы кантрабанды наркатычных i псiхатропных рэчываў, канфiскаваць больш за 20 кiлаграмаў наркотыкаў, 43,5 тоны кантрафактнай алкагольнай прадукцыi, 14,2 млн цыгарэт, 155 прадметаў, якiя з’яўляюцца гiсторыка-мастацкай каштоўнасцю. Дарэчы, заўважыў Аляксандр Шпiлеўскi, летась было выяўлена 78 спробаў хабару мытнiкам, па трох выпадках узбуджаны крымiнальныя справы. Прычым, адзначаюць у ДМК, пакараннi тут даволi жорсткiя — хабар у 20-30 долараў можа прывесцi да пазбаўлення волi на тэрмiн да сямi гадоў.