Дзiцячая ўсмешка... без плямак

Источник материала:

— Ужо на першым годзе жыцця на зубах малога могуць з’явiцца першыя прыкметы карыесу, — гаворыць Алена ЛЯХ, загадчыца стаматалагiчнага аддзялення 8-й дзiцячай палiклiнiкi горада Мiнска.

— Гэты карыес яшчэ называюць «ражковы» цi «бутэлькавы».

Але гэта не значыць, што дзеткi, якiх кормяць мацярынскiм малаком, такой праблемы не ведаюць. Прычына — звычайнае незахаванне гiгiены дзiцячага роцiка. Маленькаму чалавечку, якi толькi нарадзiўся, пасля кожнага кармлення трэба працiраць роцiк марлевым тампонам. Калi ж у немаўля цi прарэжацца першы зуб, то з яго таксама трэба здымаць налёт.

Гэта даволi простая працэдура дапамагае не толькi аднавiць мiкрафлору роцiка, але i дазволiць карапузу прывыкнуць да гiгiены з пялёнак. Калi малы адсвяткуе свой першы дзень нараджэння, яго зубкi, пасля шматлiкiх ласункаў, можна пачынаць чысцiць зубной шчоткай, але пакуль што без пасты, цi з пастай, якая зусiм не змяшчае фтору. Звычайна на ўпакоўцы такiх пастаў пазначана, што яны не шкодныя для арганiзма дзiцяцi i карыстацца iмi можна з самага нараджэння. Чысцiць зубы дзiцячай зубной пастай, якая змяшчае фтор (не больш чым 500 ррм), можна адразу, як толькi малы навучыцца паласкаць роцiк. А калi ўжо яму споўнiцца годзiк, трэба ўзяць за правiла наведваць дзiцячага стаматолага кожныя паўгода.

— Гэта дазваляе выявiць карыес на пачатковай стадыi, — тлумачыць Алена Германаўна. — Калi яшчэ можна вылечыць хворы зуб, проста пакрыўшы яго фторным лакам.

Пачатковая стадыя, гэта калi ў малога на зубках з’яўляюцца цёмныя плямкi. Гэта не значыць, што трэба заглядаць кожны дзень у роцiк дзiцяцi, шукаючы iх. Некаторыя пацямнелыя кропкi можа ўбачыць толькi ўрач i толькi ён пацвердзiць дыягназ.

Другая стадыя карыесу ўжо бачна i бацькам — дзiрачкi на зубках. Канешне, тут патрабуецца абавязковае лячэнне: трэба ставiць пломбу. Гэта не так страшна: дзiцячыя стаматолагi не заўсёды карыстаюцца сваёй «свiдравальнай машынай», калi ў iх на прыёме пацыент, якому няма яшчэ чатырох гадоў.

Трэцяя стадыя карыесу — самая небяспечная, бо патрабуе выдалення зуба. I зрабiць гэта лепш своечасова, бо калi хвароба закранае нервы i дзясну, то гэта можа нанесцi шкоду зачатку пастаяннага зуба. Тады ён вырасце з аслабленай эмаллю, схiльнай да карыесу, цi ўвогуле загiне.

Ёсць для дзетак тры спосабы пазбегнуць усе стадыi карыесу. Першы з iх — гiгiена роцiка i рэгулярнае наведванне стаматолага. Другi — перапынкi памiж прыёмамi ежы. У гэты час у роцiку дзiцяцi аднаўляецца натуральны РН-баланс.

— Лепш за ўсё ўвогуле выключыць «лёгкiя перакусы», — дадае Алена Германаўна. — Пячэнне, чыпсы, сухары, але самае небяспечнае для дзiцячых зубоў — «сасулькi». Лепей з’есцi дзве шакаладныя цукеркi i потым прапаласкаць роцiк, чым ласавацца доўгайграючымi прысмакамi. А калi дзiця па начах просiць пiць, то не варта даваць яму сок альбо iншыя салодкiя напiткi, лепей за ўсё звычайную ваду .

Трэцi спосаб — прымяненне фтарыду. Гэты элемент змяшчаецца ў зубных пастах, а таксама ў вадзе. У краме можна набыць фтарыраваную соль. Але з фторам трэба быць вельмi асцярожным. Калi яго мала, то пачынае разбурацца эмаль i ўзнiкае карыес. Калi зашмат, то можна захварэць флюарозам — эмаль цямнее i зубы становяцца жоўтымi.

Пачуццё меры ў бацькоў ва ўсiм — вось рэцэпт здароўя дзетак. I датычыцца гэта не толькi зубоў.