Рабiце газету яшчэ больш цiкавай!

Источник материала:

— Газета вызначаецца ўдумлiвым падыходам да праблем нашага грамадства, — сказаў ён, — яна не кiдаецца ў крайнасцi, шмат увагi ўдзяляе беларускай спецыфiцы, нацыянальнай культуры, заклiкае не забываць родную мову, за што калектыву журналiстаў удзячныя многiя. Мне падабаецца, што газета першай сярод рэспублiканскiх выданняў звярнулася да тэмы работы Саветаў дэпутатаў i на добрым узроўнi асвятляе вопыт iх i праблемы, выпускаючы кожны тыдзень укладку «Мясцовае самакiраванне».

Хачу пажадаць стараннаму калектыву «Звязды» больш востра ставiць маладзёжныя праблемы хоць бы па той прычыне, што грамадства занепакоена лёсам моладзi, i маюцца такiя праблемы, якiя як бы «выслiзваюць» ад улады i прэсы ў тым сэнсе, што некаторая частка юнакоў i дзяўчат паводзiць сябе не вельмi добра. Трэба, на мой погляд, удзяляць больш увагi ў гэтым кантэксце i становiшчу спраў, якiя склалiся ў так званай жаночай супольнасцi, каб нашы прыгожыя беларускi вялi сябе дастойна, каб на першым плане ў iх быў клопат аб стварэннi сям’i.

Хацелася б, каб газета працягвала барацьбу з экалагiчнымi парушэннямi, не дапускала, каб з парадку дня знiкала актуальнасць чарнобыльскiх спраў. Лiчу, што ў нас ёсць хiбы ў выхаваннi «мужчынскай палавiны». Паглядзiце, у адукацыi i культуры склалася такое становiшча, што там назiраецца перавага кiраўнiкоў-жанчын i, на мой погляд, хлопцы як бы «выкiнуты» там на другi план. Маленькiя падлеткi вельмi дапытлiвыя, яны стараюцца ўнiкнуць у многiя цiкавыя справы i, мяркую, прымушаць iх займацца вышываннем цi нечым iншым, жаночым, не зусiм правiльна. Трэба рабiць акцэнт на тэхнiчную творчасць юнакоў, нацэльваць на культуру здароўя, спорту, на iншыя чыста мужчынскiя заняткi, якiя б фармiравалi ў iх характар сапраўдных мужчын, бацькоў будучых сем’яў, абаронцаў нацыi i дзяржавы ў цэлым.

Я паважаю «Звязду». З ёй хочацца трымаць кантакт, чытаць яе. Так трымаць, звяздоўцы! Рабiце газету яшчэ больш цiкавай, настойлiвай у асвятленнi жыццёвых праблем нашай роднай Беларусi.

Уладзiмiр ПЕРНIКАЎ.