Джэмпер — ад Пінскай фабрыкi, цукеркi — ад Ідэала

Источник материала:

У Брэсце цяпер прынята ездзiць па пакупкi ў суседнюю Украiну. Яшчэ нядаўна там быў зафiксаваны рэкордны рост долара, нашым суайчыннiкам стала вельмi выгадна атаварвацца прадуктамi, ну а шырспажыў там заўсёды быў значна таннейшы. Таму ў чэргах на перасячэнне беларуска-ўкраiнскай мяжы стаялi да пяцi гадзiн. А лiтаральна ў суботу сваяк быў у раёне перахода "Макраны" i сказаў, што нiякай чаргi няма зусiм. Гэта значыць, што долар у суседняй краiне пайшоў унiз.

Суседзi, што паспелi з’ездзiць у Ковель i Ратна, засталiся задаволеныя. Прывезлi фрукты, цукеркi, масла, крупы, вiно. Я таксама збiралася паехаць, але па шэрагу прычын зрабiць гэта не атрымалася. Таму падарункi купляю ў сваiх гандлёвых кропках. Лiтаральна ў выхадныя на блiжэйшым рынку "Стары горад" купiлi сыну-школьнiку джэмпер Пiнскай трыкатажнай фабрыкi за 43 тысячы, якасны i стыльны. Там жа, у павiльёне, разгаварылiся яшчэ з адной пакупнiцай i пашкадавалi аб тым, што фабрыка не ўмее сачыць за модай i не выпускае стыльнае жаночае адзенне. Нам з Турцыi, iншых краiн вязуць прыгожы трыкатаж, толькi якасць яго выклiке сумненнi i цэны, бывае, кусаюцца. Узялi б мадэль, скапiрвалi б. А то жаночыя вырабы добрай якасцi патыхаюць учарашнiм днём.

Па традыцыi абменьваемся падарункамi з сям’ёй сяброў з Бабруйска. Для гэтай пасылкi купiлi цукеркi "Мiрабэла" ад фiрмы "Iдэал". Трэба ж фарсануць нейкiм брэсцкiм брэндам. Ну а для падарунка ў Маскву я выбрала сурвэткi з аршанскага лёну. Па-мойму, наш лён любяць ва ўсiх краiнах.