Нараканняў на жыццё пачуць не давялося...

Источник материала:

Нельга сказаць, што крызiс схапiў прадпрыемствы Баранавiчаў "за горла". Вось камбiнат харчовых прадуктаў правёў рэканструкцыю, i на прадпрыемстве балгарскiя спецыялiсты ўсталявалi лiнiю, на якой будуць разлiвацца сокi з гароднiны i садавiны ў шкляную тару. Кошт праекта — 25 млрд рублёў.

Многiя прадпрыемствы застылi ў чаканнi, хоць i масавага звальнення не назiраецца.

А недахоп грошай ужо адчуваецца. Вось у в. Вулька-2, што ў Лунiнецкiм раёне, павiнны былi пачаць будаўнiцтва школы. Ужо заплачана 106 мiльёнаў за праект i, здавалася, усё будзе iсцi па плане, тым больш, што будаўнiцтва ўключана ў праграму адраджэння сяла на 2008-2010 гады. Але высветлiлася, што гэты аб’ект у рашэннi аблвыканкама адсутнiчае.

Разам з гэтым кiраўнiцтва Брэсцкай вобласцi падкрэслiвае, што ўсе сацыяльныя праграмы будуць ажыццёўлены.

Неадназначная сiтуацыя i ў сельскай гаспадарцы. У Баранавiцкiм раёне ўзнiкла праблема з вяртаннем бюджэтных грошай, пазычаных у дзяржавы сельгаскааператывамi. Пратэрмiнаваная запазычанасць дасягнула больш за 8 млрд. рублёў. Даўгi душаць гаспадаркi, да якiх далучылi заняпалыя сельгаскааператывы, бо iх i так бралi з даўгамi.

Не ўсе СВК выканалi валавыя паказчыкi. Ды такая сiтуацыя не толькi ў Баранавiцкiм раёне. У вобласцi тэмпы росту валавой прадукцыi затарможваюцца. Прагназавалi, што вал узрасце да 132 працэнты, а яго за чатыры гады ўдалося падняць толькi да 118 працэнтаў.

Многiя праблемы ў крызiснай сiтуацыi будзе вырашыць няпроста. Вось у аграгарадках не здолелi ўвесцi ў эксплуатацыю 65 аб’ектаў — iх увядзенне перанеслi з мiнулага года на 2009-2010 гады. Не заселенымi застаецца больш за 180 дамоў у аграгарадках вобласцi.

Праз кожныя два тыднi наведваю рынак, i ў гэтую нядзелю там нiчога iстотнага не змянiлася. Людзi тоўпяцца ў мясным павiльёне, каля гароднiны, садавiны. Прыкметных нараканняў на цяжкае жыццё пачуць не давялося. Можа, нашы людзi такiя ўжо аптымiстычныя цi той крызiс не такi страшны?